Locual tin para scirbi den e palabra di Dios, ta berdad y no ta cambia, pesey nos tin di tene cuenta cu esaki:
E ladron ta bin solamente pa horta, pa mata y pa destrui,Ami a bin pa nan tin bida y pa nan tine na abundancia.( Juan 10:10).
No ta cos di haci wega cune, hopi biaha pa falta di conocemento di e palabra di Dios, cos ta bay for di man y despues tur hende kier lamenta.
Pero e aumento di falta di pordon, den famia, den nos hogar, na scol, riba caya, den negoshinan, entre colega di trabao ta algo hopi serio.
Rabia y odio no ta bini di Dios,
Vengansa no ta bini di Dios,
Abuso constant no ta bini di Dios, y no ta cos di haci wega cune.
Hopi biaha bo ta tende hende bisa, awel ami ta clean di droga, awor tin cos nan mas peor cu droga cu nos curason mester clean di dje, cual ta rabia, odio, orguyo y falsedad, pasobra esey nan ta bini directamente di diabel y nan tabata existi prome cu droga.
Senjor ta bisa cu cielo y tera lo pasa ma Mi Palabranan lo no pasa.( Lucas 21:33).
E plan di salbacion di Dios ( Juan 3:16-21) ta pa tur hende, sin exepcion, Dios a inclui tur hende Su den su plan di salbacion:
Esun cu no acepta Cristo Hesus ta pasobra e mes no kier,
Esun cu no kier biba pa Dios, ta pasobra e mes no kier,
Esun cu no ta den e boluntad di Dios, pasobra e mes no kier,
Esun cu ta rechasa Dios ta pasobra e mes kier, y nos tur sa cu caminda Dios ta,diabel no por goberna.
Y awor mas cu nunca nos por mire den e movecion di hende riba mundu manera ta para scirbi den 2 Timoteo 3:1-5 y tambe den Romanonan 1:28-32.
Hopi ta kere cu Dios ta haci wega, y nan a perde respet y temor pa Dios, cu nos por haci tur cos y sigi biba manera nada no a pasa, pero hopi no sa cu si nos no arepenti, aparta, laga los, pordona y cambia bida, e enemigo ta keda persigi nos.
Romanonan nan 18:35 ta splica nos claramente kico Dios ta haci ora nos no ta pordona di curason, y tin hopi hende ta haci wega cu esey y nan no sa cu diabel ta cohe bentaha den di bida di hende ora nan no kier pordona (2 Corintionan 2:10-11).
No chansa cu diabel pasobra diabel no ta chansa cu ningun hende, e plan di diabel pa bida di hende ta destruccion y morto, tanto spiritual como fisico.
Pesey e palabra di Dios ta bisa cu tin hopi cos ta parce bunita, pero nan final ta destruccion.
Pesey somete boso mes na Dios. Resisti e diabel y e lo huy for di boso,Hala serca Dios y E lo hala serca boso.( Santiago 4 :7-8).
Sea sobrio, sea alerta. Boso adversario e diabel, ta cana rond manera un leon cu ta grunja, buscando ken e por devora.
Si diabel no tabata existi, Hesus lo no a adverti nos di dje, pasobra e no ta algo di ignora, pero e mester wordo reprende tur momento den nomber di Cristo Hesus.
Especialmente pa tur mayor y nos hobennan nos ta duna un palabra hopi fuerte awe pa nan tene cuenta cune y no chansa cu maldad;
Ken cu ta odia su ruman ta un matado,y boso sa cu ningun matado, no tin bida eterno ta permanece den dje.( 1 Juan 3:15).
Sinceramente, Pastor Marcel Balootje
