Un grupo grandi di hulpchauffeur a manda un carta habri dirigí na ex-Minister di Transporte, Ursell Arends, Minister di Husticia, Integracion y Transporte Publico, mr. drs. Arthur Dowers, Departamento di Transporte Publico (DTP), y tur e taxistanan cu tin permiso na Aruba. Den e carta aki nan ta expresa nan profundo preocupacion y mal contento pa cu e falta di transparencia, honestidad y claridad den e otorgamento recien di 50 permiso di taxi nobo.
E hulpchauffeurnan ta cuestiona fuertemente e manera cu e otorgamento a tuma luga, insinuando cu e sistema FIFO (First in, First out) uza pa ex-Minister Arends a resulta den un abuso di nan derechonan humano y laboral, specialmente esnan cu tin 3 aña of mas den servicio activo. Nan ta lamenta cu enbes di empodera e hulpchauffeurnan, manera priminti anteriormente, e maneho di Arends a faborece famia di e taxistanan existente, e personanan cu ya tin pensioen, hende di edad avansa, comerciante y hasta e empleadonan publico cu bon salario.
E carta ta dirigi un serie di pregunta directo y specifico na ex-Minister Arends, poniendo enfasis riba e traspasonan di permiso firma durante su periodo, e criterianan uza pa otorgamento y e motibo pakico e personanan cu pasado cuestionabel of cu famia cu ya tin permiso a wordo preferi riba hulpchauffeurnan cu varios aña di experiencia. Nan ta puntra si ta berdad cu e personanan cu permiso anterior a bolbe haya permiso prome cu hopi otro, y pakico e personanan di edad avansa of cu negoshi propio a haya permiso. Un otro punto di preocupacion ta e otorgamento di permiso na un persona hospitalisa na Colombia, cuestionando con e persona aki a cumpli cu e rekisitonan medico necesario.
E hulpchauffeurnan ta denuncia e explotacion laboral cu nan ta victima di dje, unda nan mester paga sumanan substancial pa dia n’e doñonan di permiso, sin beneficio laboral of proteccion social. Nan ta calcula cu den tres aña un hulpchauffeur por paga mas di 150 mil florin na huur di permiso. Nan ta cuestiona tambe cuanto belasting e doñonan di permiso ta paga anualmente, contrastando esaki cu e situacion precario di e hulpchauffeurnan cu no por ni sikiera haya un lening bancario.
Den nan carta, e hulpchauffeurnan ta duna bonbini n’e Minister nobo, mr. drs. Arthur Dowers, y ta pidi encarecidamente pa un investigacion profundo di cada permiso otorga pa ex-Minister Arends. Nan ta spera cu Minister Dowers lo considera pa anula tur e 50 permisonan firma y duna prioridad n’e hulpchauffeurnan cu tin 3 aña of mas di bon servicio y cu no tin famia directo cu permiso di taxi. Nan ta sugeri pa otorga permiso directo n’e hulpchauffeurs cu mas aña di servicio, en bes di sigui cu e sistema FIFO cu nan ta considera inhusto. Tambe nan ta pidi pa stop tumamento di hulpchauffeur nobo te ora cu nan situacion wordo evalua.
Finalmente, e comunidad di hulpchauffeur ta spera cu nan caso lo wordo tuma cu seriedad y profesionalismo, sin represalia. Nan ta enfatisa cu nan ta sinti nan mes desampara y cu nan derechonan humano y laboral ta wordo abusa. Nan ta termina nan carta cu un grito di solidaridad y un mensahe contundente: “Aruba taxi Vergunning no ta un Patrimonio Politico ni de famia. ARUBA TAXI VERGUNNING TA UN PATRIMONIO NACIONAL.”
