I. Cambio di biyetenan di florin serie 1986 ainda ta posibel
Banco Central di Aruba (BCA) ta avisa cu, teniendo cuenta cu articulo 8, inciso 3 di e Ordenanza di Banco Central AB 1991 GT 32, e periodo di 30 aña pa cambia e biyetenan di florin di e serie 1986 pa biyetenan di florin di e serie 2019 ta bay vence pronto.
II. Fecha di vencemento pa cambia biyetenan di florin di e serie 1986
Esaki kiermen cu personanan cu pa un motibo of otro ainda tin biyetenan di florin di e serie 1986 por cambia esakinan pa biyetenan di florin di e serie 2019 te cu 31 di December 2021. Despues di e dia aki no por pa eherce e derecho di cambio di e biyetenan di e serie 1986, manera ta stipula den e Ordenanza di Banco Central.
III. Unda por cambia e biyetenan di florin di e serie 1986?
Por cambia e biyetenan di florin di e serie 1986 pa e biyetenan di florin serie 2019 solamente na e Caha di BCA na J.E. Irausquin Boulevard 8, mainta entre 8.30am y 11.45am y merdia entre 1.15pm y 3.30pm.
Pa mas informacion relaciona cu e ultimo dia di cambio aki, por tuma contacto cu Departamento di Cash Operations & Logistics na telefon 525-2139.
