Varios decenas di manifestante cu mask a reuni diabierna dilanti di e Stadion Nacional di Hapon, riba e dia cu e Weganan Olimpico mester a cuminsa, pa protesta contra e celebracion di e cita deportivo otro aña, dado e peliger relaciona na e pandemia di coronavirus. E Weganan a wordo posponi na maart y e gobierno ta dicidido pa sigui p’adilanti otro aña. Pero tin un creciente oposicion na Hapon na e evento door di e dudanan relativo na salud. Mi ta kere ta un gran eror,” Kai Toyama, di 44 aña, un artista cu a biaha for di e barionan di Tokyo pa asisti na e manifestacion chikito a bisa y a agrega cu ta iresponsabel cu Hapon ta sigui p’adilanti cu e plannan. Un encuesta reciente di Kyodo News, a mustra cu menos di un cuarta parti di e encuestadonan tabata na fabor pa celebra e Weganan otro aña, un cambio drastico teniendo na cuenta cu e entusiasmo genera den e pais pa e posibilidad di bolbe ta e sede Olimpico ora cu Tokyo a wordo eligi como anfitrion, cu a yega na 70% di e residentenan di e ciudad. Apesar di e compromiso di e organisacion di tin un evento sigur, expertonan di salud ta bisa cu e promesa aki lo ta hopi dificil di cumpli sin un vacuna eficas contra e pandemia cu lo a wordo distribui rond mundo. Tokyo a biba un rebrote di e enfermedad y e gobierno a isisti na su residentenan pa no sali for di cas, cu exepcion cu ta absolutamente necesario. Hapon a reporta 27 mil caso di e enfermedad y mil morto. “Mi no ta kere cu nos mester celebra un mega evento manera esaki te ora cu nos por mira e final di esaki,” Toshio Miyazaki, di 59 aña, un di e organisadornan di e marcha a bisa, kende a agrega cu e
gobierno mester yuda e afectadonan door di e coronavirus na luga di pensa den organisa e
Weganan. E Comite Olimpico Internacional a calcula cu e aplasamento lo costa 800 miyon di dollar,
pero no a calcula cual lo ta e perhuicio pa Hapon.

LEAVE A REPLY

Please enter your comment!
Please enter your name here