Si nos como mayor, no mantene nos yuinan den oracion, tampoco guianan riba e caminda di Dios ta ken lo hacie?
Tempo no ta pintando masha bunita, mundialmente, y locual nos muchanan ta mira ta socode, tur dia no ta e miho cosnan pa nan sinja di dje, e mundo no ta dunando bon ehempel na nos hubentud.
Television, media, internet, telefon, hasta wega pa mucha ta contamina cu negativismo.
Unda cu bo bira violencia bo ta mira, y mayornan mester ta masha cauteloso, ora nan ta cumpra cierto weganan digital pa nan yuinan.
E afecto riba mente di un mucha awendia, cu telefon por haci, ta hopi grandi, tin mucha por domina e e situacion,pero hopi ta esclavisa na nan telefon, nan tin mas contacto cu nan telefon cu nan tin contacto cu famia.
Y ta cos cu nos tin cu tuma na cuenta, pasobra tin hopi mucha bao di atake di nervio, si algo mester pasa cu nan telefon y hasta si nan data por caba.
Tene cuenta cuanto hende, no por pone nan telefon un banda:
Ni ora nan ta come,
Tene cuenta cuanto hoben no por pone nan telefon un banda, ni den misa of iglesia,
Tene cuenta cuanto hoben no sa mes cu ora nan ta papia cu hende , nan mester scucha locual hende ta bisa nan, y stop di wak den e telefon.
Hende grandi a bira ta zundra otro riba telefon sin tene cuenta na unda nan ta, y muchanan tambe ta imita esey , palabranan menos bunita ta sali.
Un telefon tabata sirbi pa un urgencia, of pa trece bon noticia , awor aki a bira fuente di redu, menasa, inmoralidad, violencia, y mas cu tur cos desunion.
Bo sa cuanto matrimonio ta na peliger, pasobra e homber of e muher ta mas den telefon cu nan tin tempo pa otro, bo sa cuanto hende ta esclavisa na pelicula riba nan telefon, cu nan ta subi riba cama enbes di tin tempo pa otro nan ta mara riba nan telefon.
Bo su cuanto hende ta neglisha nan deber matrimonial y nan famia tras di un telefon.
Ta hopi tristo pa bisa pero telefon a bira obheto di idolatria, y un dios chikito pa hopi hende, pasobra nan ta alaba nan telefon.
Palabra di Dios ta bisa hopi cla den Mateo 24:12: Pasobra inikidad lo aumenta, amor di hopi lo fria.
Nos ta mira tambe con ciencia a aumenta, y hende awor kier haci tur cos artificial, pa asina , nan por bay cu tempo, pero nan ta lubida, cu pa Dios, ta berdad y puresa ta conta.
Laga esaki permanece den nos memoria locual Filpensenan 4:8-9 ta bisa Finalmente rumannan:
Tur loke ta berdadero,
Tur loke ta honorabel,
Tur loke ta husto,
Tur loke ta puro,
Tur loke ta bunita,
Tur loke ta di bon fama,si tin algun virtud,y si tin algo digno di alabansa, laga esakinan ocupa boso mente.
Y e cosnan cu boso a sinja y a ricibi,y a tende y a mira den mi,practica e cosnan aki, y e Dios di pas lo ta cu boso.
Laga nos haci oracion, pa amistad, pa karakter, integridad,pasion pa cosnan di Dios,crecemento spiritual,discernimento,speransa y amor alcansa curason di nos hubentud.
Sea alerta, para firme den fe,actua manera homber,sea fuerte. Laga tur loke boso haci wordo haci cu amor.( 1 Corintionan 16:13-14).
E tempo den cual nos ta bibando no ta facil, e enemigo ta pone hopi hende trompica y hopi ta fria, enbes di aumenta nan amor pa Senjor.
Pesey nos oracion mester ta fuerte y ferviente.
Sinceramente , Pastor Marcel Balootje
