Ta imposibel traha un cas sin fundeshi , pasobra ta e fundeshi ta wanta e cas, y mas fuerte e fundeshi ta , mas duro e cas ta . Ora e fundeshi ta zwak e cas ta scheur y e ta cay den otro, pasobra e no tin un bon fundeshi pa wanta su peso.
Asina tambe ora nos bida no ta funda den Cristo Hesus, nos bida ta debil, y e enemigo di nos bida satanas, ta hunga yoyo cu nos pasobra nos bida no ta fundamenta den Cristo, y nos no sa ken nos ta, nos no conoce nos identidad manera ta para scirbi den 1 Corintionan 6:19-20.
Cristo Hesus ta e baranca riba cual nos mester pone e fundeshi di nos bida: E ta nos Salbador,nos Redentor, nos pronto Auxilio den tur tempo di dificultad, nos Libertador for di gara di e enemigo.Cristo Hesus a priminti cu nunca E lo bandona, tampoco desampara nos , E lo ta cu nos te na fin.
Nos bida ta depende di palabra di Fe cu sali for di nos boca cual ta trece crecemento Spiritual, cual ta e base pa yuda nos den nos bida social y material, pasobra: No sea gaña mi rumannan stima. Tur bon regalo y tur don perfecto,ta bini for di ariba, y ta baha bini for di e Tata di lusnan, cerca Kende no tin variacion ni sombra di cambio.( Santiago 1:16).
Crecemento spiritual ta mustra nos kico ta maldad,y bida di pica y locual ta deshonra Dios.Y esey ta locual nos tur tin mester, pasobra e ta duna nos disernimiento pa por para firme contra e plan di e enemigo,y resisti tentacion y malicia di mundo.
Sin fe ta imposibel agrada Dios, pasobra esun cu ta bini serca Dios,mester kere cu E ta y cu E ta Esun cu ta recompensa esnan cu ta busc’E.( Hebreonan 11:6).
Tur locual nos ta pidi , nos mester pidi den fe y sin ningun duda, pasobra esun cu ta duda ta manera un ola di laman, cu ta wordo lastra y tira door di biento. Pasobra no laga e hende ey spera cu e lo ricibi algo di Señor siendo un hende di curason dobbel, inconstante den tur su camindanan.( Santiago 1:6-7-8).
E palabranan di Fe den Dios cu ta sali for di nos boca, ta nos defensa, ta nos curashi, ta nos confiansa, den Esun cu semper a yuda y ta yuda nos. Bendiciona ta esun cu ta kere den Dios y ta pone cu confiansa den su Creador.
Hesus a bisa: Ta e Spirito ta Esun cu ta duna bida, e carni no ta bal nada, e palabranan cu mi a papia cu boso ta spirito y ta bida. ( Juan 6:63).
Tur esnan cu ta bay contra boluntad di Dios, y ta haci cosnan inmoral y no kier arepenti di nan error y cambia nan bida , tambe ta debilita den nan fe , pasobra un bida den pica y abominacion, no por agrada Dios.
Ma e husto ta biba pa medio di Fe: y si e hala atras , Mi alma no tin placer den dje. Ma nos no ta di esnan cu ta hala atras pa destruccion, sino di esnan cu tin fe pa preservacion di e alma.(Hebreonan 10:38-39).
Den Lucas 9: 62 Hesus ta bisa: Ningun hende cu ta pone man na ploeg y ta wak atras no ta apto pa e reino di Dios.
Pesey nos mester declara y profetisa palabranan di Fe riba bida di nos yuinan, pa nan por para firme.
( Numbernan 6:24-26).
Sinceramente, Pastor Marcel Balootje.
