Si un hende kier logra algo den bida e mester sali for di su zona comfortabel, e mester bay contra biento, pasobra Dios su encargo ta muchu mas grandi cu locual cu nos ta pensa.
Abraham mester a sali for di su tera sin sa na unda e ta bay , pa e bay caminda Dios kier pa e bay.
Fe ta nifica ninga bo mes, cohe bo crus y sigi Senjor.
Fe ta nifica no depende riba bo mes forsa, pero pone tur bo confiansa den Senjor.
Awor Fe ta e siguransa di cosnan cu hende ta spera,e conviccion di cosnan cu hende no ta mira.(Hebreonan 11:1).
Esnan cu ta observa biento no ta sembra,y esun cu ta observa nubianan no ta cosecha.( Ecl 11:4).
Sadrac, Mesac y Abednego tabata tin fe den Dios, y a wordo tira den fornu di candela, tumando risico cu nan bida.
Josue tabatin fe den Dios y a esforsa su mes y sea balente,y a tuma e risico di hiba e pueblo di Israel pa crusa Jordan.( Josue 1:1-2).
Pedro tabatin fe den Hesus, y a bisa Hesus, si ta Abo laga mi cana bini serca Bo, y Pedro a tuma e risico di baha for di boto, cana riba awa y bay serca Hesus.
Daniel a mantene su Fe den Dios, a tuma e risico y wordo tira den cueba di leon, y Senjor a manda Su Angel y a sera boca di e leon.( Daniel 6:22).
Tur locual nos kier logra den bida ta exigi fe, curashi y risico, pasobra hende cu ta floho, no ta bay dilanti, pasobra flohera ta trece duda, y ora un hende ta duda e no por wordo usa door di Dios.
Hende cu ta haci oracion y ta duda den e poder di Dios, ta haci oracion pornada, pasobra sin Fe ta imposibel agrada Dios.
Ora bo tin fe bo mester prepara bo mes, pasobra Dios lo haci cosnan grandi den bo bida,Dios ta bendiciona esnan cu tin confiansa den dj’E.
Jairo mester a kere solamente y Hesus a lanta su yiu (Marco 5). E oficial di rey tabata desea pa Hesus bay su cas, pero Hesus a bise bay , bo yiu ta bibu y e homber a kere. ( Juan 4:50-53).
Ester muher di gran curashi a bisa:Y asina lo mi bay serca rey, locual no ta conforme e ley, I si mi perece, mi ta perece. ( Ester 4:16).
Temor pa hende lo pone un trampa, ma esun cu confia den Senjor lo ta halsa.( Proverbionan 29:25).
Ora Dios manda bo haci algo semper lo tin oposicion, semper lo tin hende cu por mihor, semper lo tin hende cu kier carga e gloria, pero tur cos ta sosode den e tempo perfecto di Dios.
Ta tempo pa nos hobennan realisa cu nada no ta sosode sin ningun esfuerso, mester studia y prepara,mester dedica tempo na locual cu bo kier logra den bida, pasobra tur cos tin su preis.
Hopi biaha hende ta desea locual otro hende tin, cual ta envidia, pero hopi no sa cuanto perdemento di sonjo tabatin, y cuando dia mester a lanta marduga y haci Oracion pa asina logra e meta.
Pa nos salbacion un preis hopi halto a wordo paga, un preis cu nos ningun por a paga, pasobra ta ken lo duna su bida, pa su ruman, pero Cristo Hesus a hacie pa nos tur.
Pesey awor nos tur sa cu locual cu nos kier logra, nos mester esforsa nos mes y sea balente, demostrando fe den Dios,
Confia den Senjor tur ora bay,y mantene bo Fe,
Sinceramente, Pastor Marcel Balootje
