Carnival Village, San Nicolas a bira e epicentro di cultura, orguyo nacional y celebracion durante Feria Patriotico 2026. E evento a resulta un berdadero exito, kibra tur espectativa cu publico di tur parti di Aruba cu a sali pa disfruta y celebra hunto.
Durante ultimo anochi, cu presencia di Minister Wendrick Cicilia, como tambe Minister Mervin Wyatt-Ras, e publico presente por a sinti e berdadero spiritu di “Aruba Dushi Tera.” Momento special cu a recorda e significado profundo di nos simbolonan nacional, specialmente den un aña historico unda Aruba ta conmemora 50 aña di Himno y Bandera y 40 aña di Status Aparte.”
E programa cultural a brinda un variedad di presentacionnan cu a deleita e publico. Entre nan tabatin baile folklorico di Inclusion School y NTC & NLG Dancers, bou guia di Marisol Peña, manera tambe un presentacion musical impresionante di Rufo Wever Music School. Un otro momento memorable tabata e presentacion di Stephanie Quant, ganador absoluto den categoria 13–17 aña di Festival Un Canto pa Aruba su Himno y Bandera, cu su composicion “That’s Aruba.”
E festival cultural a sigui cu un presentacion anima di Grupo Rejoice, cu talentonan hoben di diferente scol di Aruba cu a canta y celebra nos identidad cultural riba ritmo di polka, tumba y wals. E publico tambe a disfruta di e presentacion di Gucci Dancers, cu a yena e escenario cu energia y ritmo, preparando e ambiente pa e gran clausura musical di e anochi.
E evento a culmina cu un presentacion extraordinario di e agrupacion musical D’Nova, cu pa prome biaha a participa den e festival Un Canto pa Aruba su Himno y Bandera y mesora a logra e titulo maximo. Hunto cu e cantante Alexa Croes, nan a conkista e publico cu e cancion ganador “Nos ta loke nos tin,” un wals componi pa Jhon Freddy Tobon Montoya y aregla pa Denny Loefstop.
Reconocimiento especial pa Grupo Rejoice
Durante e anochi di Feria Patriotico, Minister di Turismo Wendrick Cicilia a entrega un plakaat di reconocimiento na Grupo Rejoice, cu e aña aki ta celebra 15 aña di alabansa, cultura y servicio na Aruba.
Grupo Rejoice a cuminsa na Hulanda entre studiantenan Arubiano y, bou liderazgo di su fundadora Zulaika “Suki” Geerman, e grupo a crece bira un presencia importante den musica di alabansa y den e escena cultural di Aruba. Awe nan ta activo den diferente parokia y eventonan cultural rond di e isla.
Den e mundo cultural, nan tambe ta conoci como “Team Blue,” participando regularmente na eventonan manera Festival Un Canto pa Aruba su Himno y Bandera, caminda nan ta guia y acompaña hopi talento hoben.
Un aspecto special di Grupo Rejoice ta nan dedicacion na desaroyo di mucha y hoben, creando y interpretando musica cu ta inspira amor pa cultura. Hunto cu Afranina “Afra” Henriquez, e grupo ta mantene un nivel halto di disciplina y calidad musical. Tur e trabou cu Rejoice ta haci, for di ensayo te presentacion, nan ta ofrece completamente gratis como un manera di duna bek na comunidad.
Gratitud y reconocimiento
Durante e anochi, tambe a duna reconocimiento special na e sponsornan cu a haci e evento posibel, entre nan Comision Celebracion Dianan Nacional (CCDN), Departamento di Cultura Aruba (DCA) y Aruba Tourism Authority (ATA).
Den nomber di Gobierno di Aruba, a expresa gratitud profundo na tur grupo di baile, scol, mucha, hoben y gruponan cu a contribui na e exito di e anochi. Un danki special tambe a bay na tur e tentnan y participantenan cu a sostene y celebra nos cultura.
Feria Patriotico 2026 a demostra un biaha mas cu Carnival Village ta un lugar unda e comunidad di Aruba ta reuni pa celebra su identidad y cultura den un ambiente di alegria y union.
Comunidad di Aruba ta invita pa sigui celebra durante Manifestacion Cultural dia 17 di maart 2026, aki mes na Carnival Village.
Danki na tur cu a participa y a haci e anochi aki inolvidabel.
