ORANJESTAD – Diasabra ultimo a tuma lugar e di dos edicion di e festival “One Healthy You” riba e strip di Eagle Beach. Minister di Turismo y Salud Publico Sr. Dangui Oduber tabata presente y ta aplaudi e iniciativa aki, e ta yuda sigur pa conscientisa e comunidad pa hiba un bida mas saludabel.
E mandatario a menciona cu e festival aki ta cuadra cu e vision cu tin pa cu salud publico. Aruba tin su plan nacional di prevencion y recien na januari a tuma lugar e apertura di “Healthy Lifestyle Center”. E centro aki ta specialmente dirigi pa yuda tur persona cu ta riba 18 aña con pa hiba un bida mas saludabel. Nan ta duna guia manera plan di nutricion, plan di ehercicio y na forma gratis.
Minister Oduber a elogia e festival caminda tabata tin diferente booth di diferente fundacion cu ta brinda informacion gratis. Informacion pa conscientisa e comunidad cu ta hopi necesario pa por hiba un bida mas saludabel. Tambe den festival tabata tin diferente actividadnan deportivo cu mucha te cu adulto por a participa, tabata tin asta e oportunidad pa ricibi un masashi.
E festival aki a yuda tur cu a participa tin un diasabra activo fisicamente cu sigur ta promove salud. Manera ta conoci “World Health Organization” ta conseha pa participa na un actividad deportivo minimo 30 minuut pa dia pa por tin un bida mas saludabel. Minister Oduber ta kere den conscientisacion, e ta hopi importante pa yega na e meta pa baha e cifra di mortalidad y pa tin un comunidad mas productivo.
Minister Oduber a menciona cu Ministerio di Salud Publico su tarea ta pa duna informacion y pa promove salud atraves di e plan nacional di prevencion. Pa e motibo aki ta sostene e bunita iniciativa aki y ta spera cu esaki crese aun mas pa e siguiente edicionnan den futuro.
Minister Dangui Oduber ta gradici e organisador di festival di “One Healthy You” pa bin cu e iniciativa. Danki tambe na tur e fundacionnan cu a forma parti di e festival y na tur e participantenan pa haci esaki un exito.
