Diabierna anochi, dilanti Fort Zoutman, e curason historico di nos capital, Aruba a celebra un evento cultural di gran balor: e Festival Monumental di Caha di Orgel.
Un total di 10 caha di orgel a participa den e festival, cada un representando un parti di nos tradicion musical. E sonido di e cahanan di orgel a yena e anochi cu alegria, ritmo y orguyo nacional, creando un ambiente di union y pas entre esnan presente y e pasado cultural di nos isla.
E evento a conta cu e presencia di Prome Minister mr. Mike Eman cu a expresa su aprecio pa e musiconan y artesanonan cu ta preserva e tradicion di caha di orgel. E caha di orgel ta un simbolo bibo di nos identidad cultural. Mantene e tradicion aki ta fundamental pa fortifica nos sentido di comunidad y orguyo nacional. Minister Cicilia tambe tabata presente.
Ademas di e presentacionnan musical, e festival a ofrece un variedad grandi di cuminda tipico Arubiano, y entrada tabata completamente gratis, permitiendo cu tur hende por forma parti di e celebracion cultural aki.
E Festival Monumental di Caha di Orgel ta un homenahe na nos patrimonio cultural y un recordatorio di e importancia di preserva nos musica y tradicion pa e generacionnan futuro. Na final di e anochi a duna Ministernan Eman y Cicilia un wiri regalo.
