Archivo Nacional Aruba conhuntamente cu Fundacion Amigonan di Archivo tin e placer di invita e comunidad di Aruba pa un bes mas bin celebra e dia di Himno y Bandera dia 18 di maart na Archivo Nacional Aruba. Despues di 2 aña di pandemia, nos ta organisa un bes mas un exposicion y Festividad pa e comunidad di Aruba por bishita. E Festividad Nacional Himno y Bandera ta cuminsa 10or di mainta te cu 6or di atardi.
Manera e añanan anterior, Archivo Nacional Aruba ta haci apertura di un bunita exposicion. E aña aki e exposicion ta titula: “Aruba, den mashin di tempo”. Un exposicion na unda ANA kier ilustra e Aruba di antes y e Aruba di awor. Atraves di potretnan, e comunidad ta pasa dor di “un mashin di tempo”, pa mustra e comunidad actual e potretnan di Aruba di temp’aya y un potret di e temp’aki di e ubicacion acual, pa asina mustra con nos isla a desaroya durante e añanan. E potretnan ta saca dor di diferente fotografonan local y di exterior. Tin coleccion di potret di e.o. Jan Geurts, dhr. Hochstul, de Graaff y Clyde Harms.
Banda di e exposicion den e sala di Archivo Nacional Aruba tin riba e parkeo e Festividad Cultural Nacional na unda cu lo tin un stage cu musica bou encargo di Sonrisa Tropical & Grupo Zilea, Robert Maduro y Azucar, Koolbros Entertainment y Youth Extreme. Especialmente pa tur esnan cu ta busca cosnan tipico y crioyo pa come durante e dia aki, nos lo tin diferente tent cu cuminda pa tur gusto. Tin olo, kuki, cocada, awa di coco y mucho mas. Pa Pa e muchanan por entretene nan mes lo tin un kids-corner, cu dino-jump, trampoline E dia lo ta hopi ameno pa grandi y chikito. Un actividad pa famia!
E intencion cu e Festividad Nacional aki ta pa riba un dia special manera dia di Himno y Bandera pone enfasis riba nos cultura, nos custumbernan y nos pasado. E ta un dia hopi informativo y educativo pa tur nos bishitantenan.
Fundacion ADA kier gradici Archivo Nacional Aruba pa e bon cooperacion pa organisa e exposicion y evento, y un danki special ta bai pa CEDE Aruba y Setar Aruba pa e sosten financiero cu a ricibi pa por realisa e festividad cultural pa nos comunidad.
Entrada pa e exposicion ta un contribucion voluntario di Awg. 1,- pa persona, exclui muchanan bou di 5 aña, pa asina e Fundacion por sigui organisa eventonan pa por sigui engradece e cultura y historia di Aruba. Lo tin un doorprize cu ta wordo rifa entre esnan cu contribui.
