Si no tin fieldad, anto e ora ey e matrimonio, no tin pia pa para riba dje, di acuerdo cu Dios su palabra den Genesis 2:24-25.
E grandesa di fieldad den matrimonio, ta cubri henter e famia, y ta sembra e union necesario, cu Dios ta demanda den tur hogar, pa asina Dios por derama di su bendicion. ( Salmo 133).
No ta asunto di wak pariba of pabao, pero ta asunto di cumpli cu palabra y boluntad di Dios, den cual Dios ta bisa cu loke Dios a uni no laga ningun hende separa. ( Mateo 19:6).
Hende mester ta masha cauteloso den duna conseho di divorcio, pasobra Dios a duna na nos tur e ministerio di reconciliacion, esey ta nifica, pa nos reconcilia hende cu Dios, husando e palabra di Dios como base, pa asina kibra e plan di destruccion di e enemigo y sembra pas di Dios den e hogar y alavez trece seguridad den e famia.
Mescos cu ora un auto tin problema di motor, of un auto ta envolvi den un accidente, nos ta hibe un mecanico serio, un garashi adecua, y bon equipa, pa e auto por wordo drecha, y keda den bon condicion.
Asina tambe ora e enemigo ataka nos matrimonio, nos ta uni como pareha y trece e asunto, dilanti di Dios.
Pasobra matrimonio ta di Dios y e miho mecanico pa matrimonio ta Dios, Pasobra Dios su palabra ta traha tanto den prevencion como den sanacion, y restauracion.
Awor ta conoci serca nos tur cu ora hende papia di nan problema, hopi biaha nan a tuma nan decision caba, descabeya, caminda nan ta exclui pordon y bisa cu e asunto aki no tin manera pa drecha, y na e momento ey Dios ta drenta, ora nos acudi seriamente serca Dios, y Dios ta restauara e situacion.
Infieldad den matrimonio no ta solamente herida bo pareha, pero bo yuinan y tur famia cu a pone nan confiansa den e matrimonio, pesey hopi biaha famia ta keda na malo cu otro ora infieldad matrimonial tuma lugar.
Pesey Dios a pone den Su palabra y Su principionan pa asina e matrimonio tin fundeshi solido, y evita buraco caminda e enemigo por drenta.
Efesionan 5:22-33 ta duna tur informacion necesario pa e matrimonio, por resisti e avance di maldad cu ta move mundialmente, no lubida cu tentacion y inmoralidad, ta loer constantemente.
Asina esposonan mester stima nan esposa manera nan mes curpa: esun cu ta stima su esposa ta stima su mes. Pasobra nunca ni un hende no a odia su mes carni, ma ta alimente y ta cuide mescos cu Cristo tambe ta haci cu e iglesia.
Den esaki nos ta ripara cu e maltrato di pareha ta un desviacion completamente for di e palabra di Dios. Pasobra awendia tin hopi tipo di maltrato ta tuma lugar den un matrimonio, e por ta fisico, e por ta verbal, e por ta mental, y hasta por yega asina leu di ta spiritual.
Pasobra si un hende den cas especialmente e homber of e muher ta liga den asuntonan di bruheria of santeria, of cualkier otro tipo di bagamunderia cu hende ta kere den dje, e ta expone su cas na spirito nan impuro cu ta bin tormenta hasta mucha inocente.
Y esey ta infieldad na Dios, y na bo matrimonio, pasobra caminda demonjo ta domina, destruccion. division y separacion lo presenta. Pasobra e enemigo a bini solamente, pa horta, pa mata, y pa destrui.( Juan 10:10).
Sea firme den boso matrimonio, manteniendo fieldad tur momento, pasobra esey ta mandato di Dios,
Sinceramente, Pastor Marcel Balootje
