Oranjestad – Federacion Internacional di Futbol (FIFA) a tuma accion inmediato riba e crisis cu a presenta Asociacion di Futbol di Aruba (AVB), despues cu e presidente, Sr. Lacle, a wordo suspendi pa e directiva. Motibo di e suspencion segun por a compronde, tabata relaciona cu un debe di belasting cu ya FIFA mes lo manda placa pa e wordo paga.
FIFA, cu ta financia e operacionnan di AVB – incluyendo pagonan mensual di salarionan pa presidente, empleadonan i directiva, a reacciona mesora ora e a wordo pone na altura di loke a sosode, i a pidi un reunion urgente cu e presidente i e directiva.
Durante e reunion cu a tuma lugar ayera, FIFA a declara cu e suspencion di Sr. Lacle ta ilegal i mester wordo revoca de inmediato, pasobra e asunto di belasting ta den proceso di pago. Ademas, FIFA a exigi cu awe diahuebs, mester continua un reunion cu tur club di Aruba pa pasa un statuto nobo. Si esaki no tuma luga, e consequencianan por ta hopi serio pa e futbol na Aruba.
FIFA Ta Bati Alarma
Fuente interno ta indica cu si e suspencion no wordo revoca i si e statuto no wordo pasa na tempo, FIFA lo tuma medidanan duro. E por inclui cancelacion finansiero, loke lo stop tur actividatnan di futbol na Aruba i pone tur pago di empleadonan den AVB den peliger. Un situacion parecido na loke a tuma luga na Curacao aña pasa cu federacion FFK, caminda FIFA a mester interveni cu man duro pa por restablece e structura.
Tambe ta wordo bisa cu e directiva di AVB a nenga pa saca un comunicado oficial tocante e situacion, apesar di loke a wordo palabra cu FIFA. Segun fuente den mundo di futbol, esaki por ta un intento pa stroba e aprobacion di e statuto nobo i posibelmente impedi eleccio cu mester tuma luga den 45 dia.
