Federacion Mexicano di Futbol (FMF) a anuncia diabierna cu e Comision Disciplinario di FIFA a impone un sancion cu ta reduci e capacidad di publico permiti pa e partido di preparacion cu e seleccion di Mexico lo hunga mas despues contra Ghana.
“E Comision Disciplinario di FIFA a notifica FMF tocante e imposicion di un sancion cu ta consisti den e ciere parcial di e capacidad di Estadio Cuauhtémoc pa e encuentro entre Mexico y Ghana, esaki como consecuencia di e grito discriminatorio registra durante e partidonan di e seleccion Mexicano contra Ecuador y Paraguay,” FMF a informa via un comunicado.
E partidonan menciona a wordo hunga na october y november di aña pasa, 2025. E partido contra e Ecuatorianonan a tuma luga na Estadio Akron na Guadalajara, Jalisco, mientras cu e enfrentamento contra e Paraguayononan a wordo hunga na e Alamodome na San Antonio, Texas, na Merca. Den tur dos partido e fanaticada a lansa e grito homofobico pa cual e seleccion Mexicano ya a wordo sanciona na otro ocasion caba.
E partido contra Ghana di diabierna lo tuma luga na Estadio Cuauhtémoc na Puebla, un luga cu tin un capacidad pa un poco mas di 51.000 fanatico, un limite cu no por wordo alcansa pa via di e sancion ricibi.
“Cumpliendo cu e resolucion ey, a blokia algun zona pa benta di ticket na publico, conforme cu e disposicionnan estableci pa FIFA y e autoridadnan operativo di e stadion,” e comunicado a detaya.
E grito cu e autoridadnan di futbol Mexicano no por a elimina a wordo scucha fuertemente tambe dia 28 di maart ultimo durante e reapertura di Estadio Azteca, den e partido di preparacion entre Mexico y Portugal.
“FMF ta reitera su compromiso cu e eliminacion di cualkier conducta discriminatorio den e stadionan y ta haci un yamado na e fanaticada pa apoya cu pasion y respet, contribuyendo na haci futbol sigui ta un espacio familiar y inclusivo pa tur hende,” e texto a conclui.
Diahuebs ultimo, FMF a informa cu lo lansa un campaña, statico cu e apoyo di leyendanan local manera Hugo Sánchez y Manuel Negrete via rednan social, pa promove ‘e ola’ (un ritual caminda e fanaticonan ta lanta uno tras di otro y ta hisa man den laira) como e forma di apoya e seleccion en bes di uza e grito homofobico.
E urgencia pa caba cu e insultonan aki ta bini net algun dia prome cu e debut di Mexico dia 11 di juni proximo den e Copa Mundial 2026, caminda e lo enfrenta Sur Africa den e partido inaugural di e torneo na Estadio Azteca.
