Den Renaissance Convention Center, Filomena College MAVO na San Nicolas, a tene su graduacion 2024. Tawata e MC, meneer Addonsito Croes, esun cu a duna inicio na e anochi bunita aki. Den un forma unico e graduadonan a marcha cu e cancion “We Are The Champions” y drenta e sala pa despues Himno di Aruba por a zona. E oracion di bendicion tawata den man di director adhunto Jorainne Oduber y director Raquel Lampe a yama y felicita tur graduado, nan famia y amigonan cu nan logro.
Un total di 59 alumno a ricibi nan diploma di MAVO cu ta forma 81% di graduado. E scol ta sumamente orguyoso atrobe. E miho graduado a resulta Kendrick Lue. Kendrick a slaag cu e NW profiel y a ricibi su regalonan for di directorado.
Un momento hopi special a ser dedica na e hoben Judson Vrolijk cu durante e aña escolar aki, mester a biaha cu urgencia pa Hulanda pa problemanan di salud. For di Hulanda, cu ayudo di Arubahuis, Inspectie di Onderwijs y Ministerio di Educacion, Judson por a traha su examennan y termina su MAVO exitosamente. Cu un standing ovation Judson y su famia a ser ricibi y for di man di director Raquel Lampe, director adhunto Joraine Oduber y Inspecteur di Educacion Natasha Anthony, Judson a haya un plakkaat como reconocimento na su curashi, gana di logra su diploma apesar di tur e situacion cu e ta pasa aden.
Filomena College MAVO ta gradici y desea tur su graduadonan, tur clase di exito pa futuro.
