Compaña pa nan mayor- y famia, un grupo grandi di alumno a asisti na Filomena College MAVO (FCM) su opendag 2025.
E dia tawatin como tema “Destination Filomena MAVO” y e lesnan presenta a representa varios pais rond mundo. E invitacion tawatin tambe e forma di un boarding pass.
Paisnan presenta tawata e.o. Aruba, Hulanda, Hapon y Merca.
Como cu FCM ta promove e mundo creativo di arte, den e lesnan brinda, arte a sobresali.
Destinacion Hapon tawatin hasta un curso culinario caminda maestro Jennely Heiliger, hunto cu alumno Eri, a presenta e pasonan pa traha “sushi”.
Pa destinacion Aruba, e maestronan Mariela Carrion y Addonsito Croes a presenta un Quiz cu frasenan tipico Arubano caminda algun grupo a resulta ganado.
Pa CKV maestro Daisy Franken, a presenta e arte Romano di mozaïk cu papel di diferente color.
Den wiskunde, maestro Panthoflet a siña cada alumno con pa traha nan mesun Kubus.
Maestronan Joan, Aroeman y Farro a bay den e mundo di science, Mericano, siñando e muchanan con pa produci coriente.
Maestro Leocadia a encarga cu e parti di brinda informacion na e mas cu 100 persona presente.
Directorado ta gradici un y tur pa a haci e dia asina exitoso. Filomena College MAVO ta sigui disfruta di ta un scol cu ta masha gusta pa mayor- y alumnonan na Aruba.
