E fiestanan ta serca y tur caminda bo ta wak e imagen ta wordo pinta cu hopi gezelligheid manera bunita luz, dushi cuminda y momentonan perfecto. Pero hopi hende ta experencia e otro banda tambe: mas presion, mas compromisonan, mas di cosnan cu “mester”. Prome cu bo por bisa tur hende “bon pasco” ya e temporada aki ta sinti mas mane un marathon y menos mane un temporada di sosiego y reflexion.
Na botica tambe nos ta ripara esaki! No pasobra stress tin un remedi milagroso sin efecto secundario (mare!), pero pasobra stress ta influencia bo curpa completo: bo soño, bo resistencia pa malesa, bo animo y hasta den e manera cu bo ta tuma bo remedinan. Pesey aki algun tips simpel pa keda mentalmente y fisicamente fuerte durante e luna mas druk di aña.
1. Mantene simpel (tambe den bo mente!)
Nos mes ta pone hopi biaha obligacion riba nos mes: noche buena perfecto, bishita tur famia, regalo pa tur hende. Pero no tur cos ta necesario. Bisa bo mes: ki ta berdaderamente importante pa mi e aña aki? Menos presion ta nifica menos stress!
2. Pone limite pero cu cariño
December ta un temporada cu agenda ta yena lihe y facil. Pero bo por bisa “no” tambe, claro cu respect! Un manera simpel: “E ta un luna hopi yen, pero porta nos por bai bebe un coffee un mainta?” ta yega bo hopi leu. Pone limite no ta falta di cariño!
3. Tuma bo medicamento na un ora fiho y proteha bo soño
Stress ta stroba e ritmo di soño y por causa cu bo ta lubida di tuma bo medicamento na ora. Haci bo rutina facil: un lugar fiho, un alarma of un reminder den bo celular.
4. Movecion ta terapia sin costo!
No tin tempo pa gym? Bai riba un cana despues di come, bai pafo un rato pa aire fresco of hasi un stretch den cas. Movecion ta kita tension den bo curpa y ta reset bo mente.
5. Tuma 30 seconde pa hala rosea
Simpel, pero e ta traha! Tuma 4 seconde pa hala rosea aden y 6 seconde pa supla rosea afo. Ripiti esaki algun biaha. Bo curpa lo baha di e “stress mode” pa “calm mode”, hasta durante e fiesta!
6. Papia di dje
Hopi hende ta haya stress den e temporada aki, pero no tur hende ta papia over di dje. Comparti esaki cu un amigo of famia, of bin papia cu nos den botica. Nos lo por pensa hunto cubo, sea ta un cuestion di drumi miho, suplemento of yudanza cu e medicamento!
Un fiesta no mester ta perfecto pa ta bale la pena. Tin biaha e regalo mas bunita cu bo por duna bo mes… ta pasenshi y trankilidad. Y si bo mester un bista extra, nos ta semper cla pa yuda….hasta den december!
Desde awo, nos di Botica di Servicio ta deseabo un feliz temporada di fiesta, yena cu amor, felicidad y hopi alegria! Te otro biaha!
