Den presencia di Prome Minister Mike Eman, Minister di Finansa, Asunto Economico y Sector Primario Geoffrey Wever, Minister di Turismo, Transporte y Labor Wendrick Cicilia y Minister di Husticia, Integracion, Energia y Transporte Publico Arthur Dowers, Gobierno di Aruba y Oranjestad Investors Group (OIG) a firma un Letter of Intent (LOI) cu ta representa un paso significativo den direćion di revitalisacion di Oranjestad.
E firmamento aki ta simbolisa no solamente un compromiso formal entre gobierno y sector priva, sino tambe un momento crucial den e proceso pa trece bek e dinamismo y bida na nos capital.
Desde e lansamento di Oranjestad Investors Group (OIG) a tuma pasonan concreto pa acelera e desaroyo di centro di Oranjestad. E grupo, cu ta inclui actualmente 12 inversionista, a traha un plan strategico cu incluyendo tur e area centrico, cu e meta pa renoba infrastructura, crea ambiente sigur y atractivo, y duna un impulso nobo na actividad economico y social den Oranjestad.
E acuerdo firma awe ta un continuidad logico di e Kick-off Session cu a tuma luga na luna di juli, caminda Minister-President Eman y Minister Wever a expresa cu revitalisacion di Oranjestad ta un prioridad central den Programa di Gobernacion AVP-Futuro 2025–2028. E proyecto ta visualisa un centro urbano vibrante, caminda biba, traha y recreacion ta bin hunto den mesun espacio.
E Letter of Intent ta contempla e ehecucion di dies punto di urgencia, incluyendo un plan operacional pa mehoracion di iluminacion, limpiesa, maneho di desperdicio, siguridad, y un mapa di prioridad infrastructural pa drecha caminda y acera, amplia area di parkeer y crea mas sombra y comodidad pa bishitante y residente.
Pa facilita un ehecucion agil y coordinacion eficiente, Gobierno di Aruba a nombra un persona di contacto dedica exclusivamente na e proyecto di Oranjestad, cu lo sirbi como e contacto permanente entre OIG y gobierno.
Oranjestad Investors Group (OIG) a expresa nan gratitud profundo na Gobierno di Aruba, y particularmente na e ministernan presente, pa nan liderazgo, dedicacion y fe den e potencial di Oranjestad.
E firma di e Letter of Intent ta confirma e compromiso comparti pa trece bida nobo den nos capital — un Oranjestad moderno, sostenibel y prospero, na servicio di tur ciudadano di Aruba.
