Directiva di “Sindicato di Trahadornan di Aruba” , STA , a firma CAO cu gerencia di e compania “New India Assurance Aruba” diaranson dia 27 di november 2024.Despues di un negociacion relativamente cortico directiva di STA conhuntamente cu su delegadonan y gerencia di New India a sa di yega na un contrato nobo bon balansa y cu tur e ingredientenan necesario pa ta un bon CAO.
Tur empleado lo conoce aumento tur aña dependiendo di nan prestacionan pa cu e compania, aumento den dianan di vacacion , bashi premie na comienso di cada aña cuminsando aña 2025, tambe empleadonan lo haya haya nan prima di vacacion y nan prima di fin di aña y hopi mas beneficio secu dario pa fortalece un bon contrato colectivo.Aparte di tur esaki tambe e empleadonan lo ricibi na final di cuenta un “signing bonus”.Mester bis cu mirando tur e beneficionan cu e contrato colectivo ta encera a dicidi conhuntamente cu e miemdronan di e sindicato y e delegadonan pa firma e CAO pa 5 aña cuminsando dia 1 di december 2024 y terminando 30 di November 2029.Directiva di STA kier a felicita e trahadornan di New India cu nan CAO nobo y tambe gradici gerencia di e compania pa su dedicacion den esaki sin lubida e tremendo labor di nan delegadonan. Ta di spera awor cu tur lo disfruta di e CAO aki sin lubida nan compromiso cu e compania pa tambe nan cumpli cu nan debernan diario.Un biaha mas PABIEN.
