Hues di Corte di Husticia a trata e caso penal cu Ministerio Publico a cuminsa contra e homber Haitiano C.E. (51) biba na Aruba. E ta wordo acusa di traficacion di damanan y tabata forza e damanan haci prostitucion.
SOLO DI PUEBLO por a compronde cu Fiscal a exigi 4 aña di prison pa C.E. y tambe pa honra e demanda di daño inmaterial di 10 mil florin.
PRESIONA MUHERNAN DI BIDA
Diabierna tratamento di e caso a tuma lugar contra C.E., doño di dos bar na San Nicolas. Fiscal a bisa Hues cu tin 5 acusacion contra C.E. cu ta encera cu e aña aki entre Januari y Maart 2025, a haci traficacion di damanan di exterior cu a bin Aruba pa traha como muhernan di bida. Tambe cu e tabata presiona e damanan pa busca cliente pa asina por paga e huur di camber. Tambe cu e lo a laga muhernan haci prositucion, siendo cu e ta prohibi.
TRAFICACION DI HENDE
Hues a puntra C.E. riba e traficacion di hende pa bin traha den bar. Segun C.E., e dama J. lo yam’e y el a bisa cu e lo por yuda den prostitucion. C.E. a splica Hues cu e regla di su barnan ta, cu ta paga e permiso di estadia pa e damanan y ta paga nan aseguro medico. Ta duna e damanan lugar pa keda y mester mantene e camber limpi. Nan ta permiti pa traha solamente den e 2 barnan na San Nicolas. Nan no por bay traha na otro bar. Nan ta liber di haci otro cos riba nan mes. Segun C.E. e ta bisa e damanan cu mester paga 110 florin pa e camber. Ta asina cu e dos barnan tin en total 8 camber.
DOÑO DI BAR TA NENGA
Hues a bisa cu e dama J. a declara na Polis, cu e mester paga 10 florin, si e haya cliente y si e bay cu un cliente pafor di e bar, e mester paga 100 dollar boet. Segun C.E., esey no ta berdad. El a bisa cu no tin boet. Segun C.E., ta e damanan ta bisa e cliente esey, pa nan gana mas placa. C.E. a duna un splicacion amplio na Hues con negoshi di prostitucion ta y con e damanan tabata cobra clientenan cu no ta asunto di bar. Hues a mustra cu e otro dama L. tambe a declara mesun cos. Hues a sigui bisa cu tin un testigo dama cu tambe a declara mesun cos. Un dama empleado di e bar, dama M., a bisa cu pa cada cliente cu bay den camber mester paga 10 florin y si bay cu e cliente for di bar ta 100 dollar. Si e dama keda mas cu mey ora den camber, e mester paga boet.
C.E. tabata sacudi cabez y a bisa Hues cu e damanan ta gaña. El a bisa cu e damanan ta paga solamente 110 florin pa e camber. C.E. a bisa Hues cu tin damanan ta palabra cun’e pa bisa cu ta cobra 100 dollar di boet pa asina nan cobra e cliente pa nan haya e placa. Fiscal a haci C.E. un serie di pregunta y C.E. cada vez ta bin cu splicacionnan grandi. Fiscal tabata hala su atencion pa duna contesta y no bin cu storianan.
DEMANDA DI DAÑO
Un dama di e instancia cu ta yuda hendenan, a hiba palabra den Corte y a haci demanda di daño. El a bisa Hues, cu e dama L. mester a paga 651 Florin pa pasashi y 180 florin pa por a sali for di Aruba. Ta gastonan cu Gobierno a paga pasobra L. no tabatin placa. Tambe L. a demanda e placanan cu e lo a gana C.E. den 56 dia. E dama a bisa cu L. mester a keda den un shelter promer cu el a bay for di Aruba. E dama a demanda daño inmaterial di 10 mil florin.
FISCAL A BAHA PISA
Fiscal a bisa Hues cu C.E. a usa e damanan pa gana placa riba nan cabez door di laga nan haci prostitucion. Fiscal a mustra cu segun ley, ora ta explota damanan, ta tacha integridad di e damanan. Na opinion di Fiscal, ora ta pone e damanan haci prostitucion, no por papia di libertad. Fiscal a bisa Hues cu e ta haya e declaracion di e damanan creibel.
Na opinion di Fiscal, C.E. tabata gana 6 biaha mas hopi placa cu e huur di e cambernan compara cu loke e bar mes ta produci. El a mustra cu e damanan a bisa cu nan mester a paga hopi placa na huur y nan mester a traha pafor di bar pa asina genera placa pa paga huur di camber y manda placa pa famia. Un di e damanan a bisa cu el a paga 14 mil florin na C.E.
Fiscal a exigi 48 luna di prison di cual 6 luna ta condicional cu un tempo di prueba di 5 aña. Fiscal a bisa cu e parti condicional ta pa forza C.E. stop di explota hende di e forma aki. Tambe Fiscal a exigi pa prohibi C.E. cu den e periodo di 5 aña pa pidi permiso pa trece hende of laga otro hende pidi permiso. Fiscal a sigui bisa cu e demanda di daño material no ta admisibel pero e demanda inmaterial si. E demanda inmaterial ta 10 mil florin of 60 dia sera.
ABOGADO
Mr. D.Croes a bisa Hues cu C.E. ta desmenti e acusacionnan.E abogado a bisa cu trabao di prostitucion ta prohibi na Aruba. E abogado a bisa Hues cu e damanan cu kier bin Aruba pa traha den prostitucion, ta haya un carta hopi specifico kico por spera nan. Nan ta firma e carta aki di ta di acuerdo. Hasta tin tipline pa e damanan por denuncia abusonan. E abogado ta haya straño con Fiscal ta cambia cosnan cu no ta berdad. Na opinion di mr. Croes, ta e damanan ta yama y pidi C.E. pa nan bin traha na Aruba. E abogado a bisa cu C.E. tabata gana 110 florin pa dia pa camber y no ta gana mas. El a remarca cu e dama a gaña cu el a paga 14 mil florin, siendo cu ta menos cu 1 luna el a keda Aruba. Na opinion di abogado, no tin ningun violencia fisico y tampoco menaza verbal di parti di C.E. No ta asina cu C.E. tabata cobra boet di 100 dollar ora cu un dama ta bay cu cliente for di bar. E abogado a mustra cu tin declaracion di otro damanan cu ta bisa cu no mester a paga boet di 100 dollar. Na opinion di abogado, tres dama no tabata contento pasobra negoshi di prostitucion no a bay manera nan a kere y nan a bay haci denuncia. El a pidi Hues pa declara C.E. liber. Pa loke ta demanda di daño, el a pidi Hues pa rechaza e demanda.
Hues a sera tratamento di e caso y 31 October lo tin sentencia.
