Awe mainta e homber Hulandes J.P.(30) a presenta dilanti Hues pa e caso penal cu Ministerio Publico a cuminsa contra dje. Fiscal ta haya J.P. culpabel di a manda auto riba un agente di Polis.
SOLO DI PUEBLO por a compronde cu aunke cu J.P. ta para riba cu no ta asina, Fiscal ta hay’e culpabel di a manda auto riba Polis y tabatin cantidad di droga den auto.
E acusacion cu Fiscal a presenta den Corte contra J.P. ta cu riba 17 October 2024, a purba di mata un agente di Polis cu auto, door di manda e auto riba e agente di Polis. E agente mester a bula un banda pa evita di wordo gedal. Fiscal a acusa e homber J.P. di intento di mata, intento di haci daño severo. Tambe Fiscal ta acusa J.P. di posecion di marihuana y cocaina.
MANDA AUTO RIBA POLIS
Ta asina cu J.P. ta para riba cu e no a manda auto riba e agente di Polis. Hues a bisa cu J.P. a wordo para door cu Polis a constata cu e tabata core duro. J.P. a admiti cu e tabata core duro. Na e retonde di Sero Thijshi el a wordo indica pa para. Hues a bisa cu segun e relato di Polis, e agente a para dilanti di auto y indica J.P. pa para. Segun J.P. no tabatin ningun agente di Polis, para dilanti di e auto. Hues a puntra J.P., pakico el a sigui core. Segun J.P., el a sigui core pasobra e tabatin droga cun’e. Hues a mustra cu segun e agente di Polis, e mester a bula un banda pa evita cu e auto a dal’e. J.P. a keda nenga esey.
Hues a bisa cu na Polis, J.P. a bisa cu e tabata bou influencia di droga y pesey el a actua asina. Segun J.P. no ta asina. Hues a bisa cu tabatin reconstruccion di e incidente y eynan a constata cu enberdad e agente A. tabata para dilanti di e auto y e otro agente tambe a bisa cu el a mira su colega bula un banda.
Segun J.P., e dos agentenan ta amigo y e otro no ta bay bisa cu no ta asina. Hues a mustra cu Polis a constata cu J.P. tabata core 160 km. den e Hyundai Sonata. J.P. a remarca cu e no ta kere Polis. Hues a bisa cu J.P. a para ora e agente a mustr’e pa para y despues a primi gasoline. Despues a sigui un persecusion. J.P. a bisa Hues cu el a cende e luznan hazard pa indica cu e lo stop.
DROGA DEN AUTO
Hues a bisa cu J.P. tabatin marihuana y cocaina den e auto. Fiscal a remarca cu e droganan tabata den saconan chikito. El a puntra J.P. tocante e droga y J.P. a bisa cu e ta haci uso di su derecho di silencio. Hues a remarca cu J.P. tin carchi di castigo cu hopi caso cometi na Hulanda.
FISCAL A EXIGI 18 LUNA DI PRISON
Fiscal a bisa Hues cu e ta haya J.P. tabatin droga den auto. Polis a haya 14,75 gram di marihuana, 10 gram di hash, 8,14 gram di cocaina.
Pa loke ta e mandamento di auto riba Polis, Fiscal a mustra cu tin dos declaracion, esun di e agentenan y esun di J.P. cu ta nenga. Na opinion di Fiscal, e agente mester a bula un banda pasobra J.P. a bay cu e auto cu velocidad halto riba dje. Fiscal a mustra cu J.P. a duna declaracionnan diferente di otro y e ta haya cu mester kere loke Polis a skirbi den e relato.
Fiscal a bisa Hues cu despues cu J.P. a bisa cu e auto ta modern y tin un sistema di safety automatic cu ta para e auto si tin algo su dilanti, Polis a bay investiga y e sistema aki no ta traha y tampoco e systema di brake.
Segun Fiscal, dia 17 October 2024, J.P. a purba mata e agente di Polis cu auto. Fiscal a remarca cu na Hulanda, J.P. tin un carchi di castigo hopi largo. El a mustra cu na 2016 caba, a condena J.P. na 6 aña di prison pa intento mata. Tambe J.P. tin condena pa droga. Fiscal ta considera J.P. un residivista. Fiscal a exigi 18 luna di prison pa J.P. E droga haya den auto lo wordo destrui. E cellular y placa cu a confisca, lo mester wordo debolbe.
ABOGADO
Abogado mr. Hernandez a bisa cu e ta haya cu no por prueba intento di mata. El a mustra cu e agentenan di Polis a duna declaracion contradictorio y pesey mester laga nan declaracion afo. E abogado ta haya cu e declaracion di e agente, no ta cuadra cu loke realmente a sosode. El a bisa cu riba su insistencia a haci un reconstruccion y no ta manera cu Fiscal ta bisa. E abogado a bisa cu J.P. a para y ora Polis a bis’e pa bay para un banda, el a core bay. Ningun momento e agente di Polis a para dilanti di e auto. Segun e abogado, durante reconstruccion e agente a bisa cu J.P. no a bin cu velocidad halto riba dje ora el a duna indicacion pa para. E abogado ta haya cu J.P. tabata core poco poco pa bay para unda e agente a indica pa para. Segun e abogado, e no ta haya cu e agente a bula un banda sino a hala un banda. E agente a dal e auto cu su man pa bisa J.P. pa para y e ora ey J.P. a primi gasoline y core bay.
E abogado no ta haya cu por papia di intento di mata, intento di causa herida severo. E abogado a bisa cu e sistema di seguridad, segun J.P., tabata traha. Por ta despues di e incidente esaki lo a daña. El a menciona un sentencia di Hulanda, caminda a declara un chofer liber di intento di mata un agente y a condena e persona pa no sigui orden di Polis y a haya 11 dia di prison. Na opinion di e abogado, Fiscal no a menciona cu J.P. a nenga di sigui indicacion di Polis. E abogado a bisa cu ya caba J.P. tin 6 luna di prison. El a pidi Hues pa pone J.P. den libertad. E abogado tambe a pidi Hues pa duna castigo igual na loke J.P. a sinta caba. Hues a sera tratamento di e caso y a bisa cu dia 25 April 2025 lo tin sentencia.
