Dialuna mainta Hues di Corte di Husticia, a trata e caso penal cu Minsiterio Publico a cuminsa contra e Homber E.G. (22) acusa di bende droga y posecion di arma di candela.
SOLO DI PUEBLO por a compronde cu tabatin discusion entre Fiscal y abogado si e scuchamento di cellular tabata corecto. Fiscal ta haya cu e ta corecto mientras cu abogado mr. Carlo ta haya cu RST a scucha otro cellular cu no ta di E.G.
BENDEMENTO DI DROGA
E acusacionnan cu Fiscal a presenta contra E.G. ta cu entre Mei 2025 y October 2025 tabata bende marihuana y entre 6 Augustus 2025 y 24 November 2025, posecion di armanan di candela.
E.G. a bisa Hues cu tur cos a cuminsa door di envidia cu hendenan tin riba dje pa asina daña su compania y nan a haya e contractnan cu e tabatin. Segun E.G., nan a yama Polis y duna tip. Segun E.G., el a lanta su compania di transport. Awor ta su tata ta yud’e y su ruman homber. Su tata ta sufri di hopi stress. El a pidi Hues pa lag’e liber pa asina e por sigui traha.
SOSPECHOSO TA NENGA
Hues a bisa E.G. cu Polis a haya tip cu E.G. lo ta bende droga y investigacion ta mustra cu a haya cos. E.G. a bisa Hues cu nunca el a huma marihuana. Segun E.G., investigacion mes ta mustra cu nunca e tabatin marihuana y no tabata bende. Hues a bisa cu Polis a mira cosnan den su cellular.
Hues a bisa cu Polis a haya tip for hende cu a duna number di cellular di E.G. Polis a bay investiga e cellular y tambe check facebook. E cellular a wordo investiga 13 October 2025 caminda a scucha combersacion riba diferencia di opinion riba prijs. Ta papia di 175 florin y e otro persona a bisa cu ta 125 florin. Hues a bisa cu investigacion ta mustra cu e prijs ta cuadra cu e screen shot di 10 gram di marihuana cu a haya riba e cellular pa 175 florin. Segun E.G., e no a papia nada di prijs riba yamada. El a bisa Hues cu e hende ey cu tabata papia no ta e. El a splica Hues cu hendenan cu ta traha cun’e sa fia su cellular pa haci yamada. Hues a bisa cu esey ta haci dificil pa investiga. E.G. a bisa cu e ta usa marihuana y ora e mira producto bon pa cumpra, e ta saca screen shot. Hues a remarca cu net 13 October pa casualidad un trahador di E.G. a usa e cellular di E.G. y tabata papia di marihuana na balor di 175 florin. Hues a bisa cu no tin claridad riba esaki.
Hues a mustra cu 27 November 2025 Polis a detene E.G. cu un I Phone. Hues Comisario a duna orden pa investigacion e cellular. Polis a constata den e cellular potretnan di droga for di Augustus 2025. Tambe tin un potret di un baby drumi riba un cusinchi di marihuana. Hues a puntra E.G. riba esaki y el a bisa cu e kier papia promer su so cu abogado. Despues E.G. a bisa Hues cu el a cumpra e marihuana na Augustus 2025 y no a logra bende na September y October. El a bisa cu el a bende na October 2025 pero no kier bisa nada cu kende el a bende. El a sigui bisa cu na November 2025, nan a horta e marihuana for di su auto. El a admiti cu e potret di e baby ta el a sak’e. El a admiti cu na October 2025 e tabatin potret di marihuana y a purba bende. El a nenga di a papia na cellular tocante bende droga.
POTRETNAN DI ARMA DI CANDELA
Hues a bisa cu den cellular tambe Polis a mira potretnan di armanan. Hues a mustra potret di un pistol cu ta mustra riba hendenan. Segun E.G., el a saca e potret pero e ta un lighter y no un arma di berdad. El a bisa cu dos aña pasa ora e tabata na un finca na Colombia, el a saca e potret di e arma automatico. El a djis saca un potret cu e arma. E no por bisa si e arma ta di berdad. Hues a mustra cu Polis a mira diferente potretnan. Hues a mustra diferente arma. Na dado momento E.G. a bisa cu un di e potretnan di un arma automatico no ta un arma di berdad sino un arma traha di palo. Abogado mr. Carlo a bay mustra Hues e potret. E.G. a bisa cu un amigo di dje cu ta traha na un lugar di palo, a trah’e.
SCUCHA COMBERSACIONNAN
Hues a mustra cu Polis a haya diferente combersacionnan tocante marihuana. A interoga e homber C. kende a bisa cu na October 2025 el a cumpra 1 biaha marihuana for di E.G. Tambe tin combersacion cu otro persona y na November 2025 a bende. Tambe un hende M. a bisa cu a cumpra na October 2025 y November 2025 marihuana for di E.G. Hues a remarca cu awor ta resulta cu E.G. a bende diferente biaha den October 2025. Segun E.G. el a bende pero no hopi. Hues a bisa cu a scucha E.G. ta papia cu un otro persona tocante un pistol Glock. Segun E.G. ta berdad pero cu e tabata hunga rol cu e ta poderoso pero no tabata asina.
EXIGENCIA DI FISCAL
Fiscal a bisa Hues cu e ta haya legalmente proba cu E.G. tabata bende droga y posecion di arma di candela. Fiscal a mustra cu Polis a haya potretnan di marihuana den cellular di E.G. Tin un potret caminda ta mira un baby drumi riba un saco di marihuana. Tin diferente potret di marihuana cu prijs. Tin chatnan riba cellular riba marihuana. E testigonan a bisa di a cumpra marihuana for di E.G.
Fiscal a sigui bisa cu a mira potretnan di armanan di candela. Tin un potret di 24 November 2025 di E.G. cu un arma automatico. Expertonan ta mustra cu ta armanan real. Fiscal a bisa cu e no ta kere E.G. cu el a saca potretnan na Colombia. Investigacion ta mustra cu e potretnan a wordo saca na e cas unda E.G. ta keda. Tin un otro potret cu E.G. cu un pistool. Esun cu E.G. a bisa cu ta un lighter. Fiscal a pidi Hues pa declara E.G. liber pa esaki. Fiscal ta haya cu E.G. tabata dedica su mes cu bendemento di marihuana y tabatin arma pisa. Na opinion di Fiscal, no tin un bista cla cuanto droga E.G. a bende. Fiscal a bisa cu e ta kere cu e arma ainda ta riba caya.
Fiscal a exigi pa E.G., 30 luna di prison di cual 6 luna ta condicional cu 3 aña di prueba. Fiscal a bisa cu e I Phone mester keda confisca.
MESTER DECLARA SOSPECHOSO LIBER
Abogado mr. Carlo a bisa Hues cu e ta haya cu no por usa e pruebanan cu Polis a bin cun’e, door cu tin numbernan di registro di cellular (IMEI) cu no ta cuadra. E abogado a bisa cu loke miembronan di RST ta splica tocante IMEI, no ta cuadra cu e realidad. E abogado a mustra cu RST den su investigacion ta papia di Samsung y despues ta papia di un I Phone. E abogado ta haya cu algo a bay robez den e investigacion y mester kita tur pruebanan. E abogado a mustra cu I Phone ta usa un codigo tras di cada potret y esey ta e unico potretnan cu E.G. a saca y no e otro codigonan. El a mustra cu Polis no a haya arma 21 November 2025 y tampoco December 2025 ora a haci investigacion na e cas. E abogado a bisa cu Polis ta basa su mes riba potretnan den cellular. Na opinion di mr. Carlo, varios di e armanan no ta real. Tin air soft cu ta parce un arma real. E abogado a mustra cu E.G. tin un I Phone y no Samsung. Tin potretnan cu no a wordo saca cu e I Phone di E.G. Por tin screen shot of download. E potret di arma saca na Colombia segun abogado, ta un air soft. Un otro arma saca, ta un screen shot y no ta saca na cas di E.G. E abogado a bisa cu e arma automatico ta saca dos aña pasa na Colombia y down load riba E.G. su cellular.
E abogado ta haya cu no tin prueba cu E.G. tabatin un arma di candela. Tambe el a mustra cu e potretnan di marihuana riba cellular, no ta suficiente pa usa como prueba di bendemento di droga. E abogado a sigui bisa cu no tin suficiente testigo cu ta mustra cu E.G. tabata un bendedor di droga. Ademas no a haya nada cu ta mustra cu e tabata bende. Ta solamente un tap tin. E abogado a pidi Hues pa declara E.G. liber di posecion di arma y bendemento di droga.
Hues a sera tratamento di e caso y a bisa cu dia 29 Juni 2025 lo tin sentencia.
