Diabierna mainta e homber B.(43) a presenta den Corte pa e caso penal cu Ministerio Publico a cuminsa contra dje. E ta wordo acusa di a secuestra, viola y maltrata severo su señora.
SOLO DI PUEBLO por a compronde cu Fiscal a exigi 7 aña di prison pa B. E señora V. na yoramento den Corte a bisa cu el a hera perde su bida. El a pidi Hues pa no solamente duna castigo sino pa garantiza cu algo asina lo no pasa mas.
Den sala di Corte tabata presente e señora V., kende a haci uso di su derecho di expresa su mes y tambe haci demanda di daño.
Hues a puntra B. kico e ta pensa di e acusacionnan. B. a bisa cu e tempo ey e tabata bao influencia di droga y tabata un otro persona. El a bisa Hues cu e ta para pa loke el a haci. El a admiti di a maltrata e dama V. El a bisa Hues cu su wowo a bira scur y e no ta corda kico a pasa exactamente. Hues a mustra cu B. durante interogacion na Polis dia 11 Augustus 2025, e no a menciona cu e no ta corda. Hues a bisa cu e dama V. a bisa Polis cu B. a maltrat’e cu su cellular den man. B. a reacciona cu nan tin 20 aña casa y cu e no ta bay viola su señora V.
Hues a mustra B. potret con V. a keda den hospital. Por a mira e dama V. cu su banda di cara robez tur hincha. B. su reaccion tabata, cu el a baha cabez y despues a bisa cu e no por kere cu el a haci e cos ey.
SECUESTRA SU SEÑORA
Hues a bisa cu apesar cu V. a bisa B. pa no bay na su trabao, B. a bay tog. Na trabao, B. a gara V. y lastr’e bay pafor di e lugar. E dama V. tabata grita, yuda mi, yuda mi. Apesar di esey, B. a lastr’e bay den auto y bay for di e lugar. Hues a bisa cu esey ta wordo considera un secuestro. Hues a bisa cu tin video di camera di trabao cu ta mustra con e secuestro a sosode.
VIOLA Y MALTRATA SU SEÑORA
Hues a sigui bisa cu V. a bisa Polis, cu na e cas, B. a forza V. tene relacion sexual cun’e. Ta asina cu nan ta separa y V. tabata biba un otro caminda. B. a reacciona cu si V. no tabata kier tin relacion sexual, e por a bisa. Hues a mustra cu segun V. su declaracion, B. a bay su cas y lock e porta y forza V. tin relacion sexual cun’e. Segun V., e no tabata kier tin relacion sexual pero B. tabata insisti. Despues B. tabata kier pa V. habri su cellular pa e wak aden. Na dado momento B. tabata dal V. cu e cellular na su cara. B. a bisa Hues cu den KIA el a busca Dios y el a arepenti y ta para pa loke el a haci. Fiscal a remarca cu B. ta bisa cu el a arepenti y entrega na Dios pero den Corte e no ta bisa tur cos!
Fiscal a mustra cu riba whatsapp, Polis a constata cu 9 Augustus 2025, B. tabata insisti cu e tabata kier tin relacion sexual cu V. pero V. tabata nenga. Ta asina cu B. tabata insisti y a bisa cu e lo haya loke e kier. Despues B. ta bay na trabao di V. y a ranca V. y bay cun’e contra su voluntad y viol’e. B. a bisa Hues cu e tabata hopi depresivo. Fiscal a remarca cu segun V., e problema mas serio tabata cu B. tabata usa droga. Fiscal a remarca cu ta hopi dificil pa kere cu despues cu B. a secuestra V., cu V. lo a tene voluntario relacion sexual cu B.
Durante interogacion di Hues, B. a bisa cu den KIA el a realisa cu e tabata haci malo y a haya ayudo di trahador social.
VICTIMA HOPI EMOCIONA DEN CORTE
E dama V. a papia den Corte y e tabata hopi emociona. Na yoramento el a bisa Hues cu tabata un milager cu e ta na bida. El a bisa cu el a wordo viola, secuestra y maltrata. El a bira wak riba famia di B. cu tabata sinta den tribuna y a bisa, si famia di B. a scucha su peticion di ayudo, cos lo no a bira asina. Segun V., tur cos a cambia ora cu el a haya sa cu B. tabata usa droga. El a bisa cu a bay busca ayudo pero nada. Nan tabata bay psycologo pero no tabata haya atencion pa e uso di droga di B. V. a bisa cu tur dia e tabata wordo molestia door di B. y pa motibo di seguridad el a bay for di cas. V. a bisa Hues cu B. tabatin un cuchiu cu V. su nomber riba dje. V. a sigui bisa cu el a kere cu B. lo a bay rehabilita pero esey no a sosode. El a bisa cu te awe e ta afecta pa loke a sosode cun’e. V. a bisa cu e persona cu e tabata comparti su bida, e hera mat’e. El a bisa cu e ta biba cu hopi angustia y dolor. V. a bisa Hues cu e caso aki a afecta nan yiunan y famia. E yiunan tin miedo di nan mesun tata. El a bisa cu esun mas chikito a keda afecta y tabata corta su mes na man. Actualmente e yiu ta bao tratamento.V. a bisa Hues cu e yiu chikito ta esun cu a haya e pipanan di droga di B. na cas. V. a pidi Hues pa no solamente castigo, sino un seguranza pa preveni cu algo asina lo bolbe sosode. El a bisa cu e ta pordona B. y ta pidi Hues pa yudanza pa B. rehabilita. V. a bisa Hues cu nan yiunan no kier wak B. asina. Ta asina cu V. a demanda 15 mil florin na daño inmaterial y 300 florin pa su cellular cu B. a kibra.
FISCAL A BAHA PISA
Fiscal a bisa Hues cu e adiccion di B. a causa cu e drama cu a sosode 11 Augustus 2025. Fiscal a mustra cu for di e chat riba whatsapp cu Polis a haya por constata cu B. tabata blo kier tin relacion sexual y V. tabata nenga. Dia 11 Augustus 2025, B. a bay te na trabao di V., gar’e, lastr’e ariba caminda, hink’e den auto. Na e cas, V. a wordo viola y maltrata. Fiscal ta haya cu e maltrato ta severo y potret ta mustra esey bon cla. Fiscal a mustra cu V. mester a keda 5 dia interna den hospital pa hemoragia celebral, door cu B. a dal V. cu forza diferente biaha na cara. Fiscal ta haya cu B. a tacha e integridad di V. kende a keda afecta y awor ta wardando pa haya tratamento di psycologo. Nan yiunan tambe a keda afecta. Fiscal a exigi 7 aña di prison, kitando e tempo cu B. ta sera. El a bisa cu el a tene cuenta cu peticion di V., pa B. haya tratamento. Fiscal ta kere cu ora yega e momento di libertad condicional, lo bay haci pa B. rehabilita. Pa loke ta e demanda di daño di 15 mil Florin, Fiscal a mustra cu ainda V. mester haya tratamento. El a pidi Hues pa aproba e demanda di daño y pa pone e medida di pago. Tambe el a pidi Hues pa aproba e demanda di 300 florin pa e cellular cu B. a kibra.
ABOGADO
Abogado mr. D.Croes a bisa Hues cu e caso ta hopi tristo. E pareha ta stima otro hopi. Loke a sosode ta e uso di droga pa dianan tras di otro door di B. E abogado a bisa cu B. tambe a wordo maltrata pisa door di Polis. Ta pesey B. a bisa cu e no por a corda kico a pasa. Ta despues B. a bin corda algun cos. E abogado a remarca cu e detencion den cel di warda di Polis tabata inhusto y asina mes B. a wordo hiba KIA. El a mustra cu Hues Comisario mes a confirma esey. Mr. Croes a pidi Hues pa tene cuenta cu esaki. El a bisa cu B. no por a kere e potretnan di maltrato di V. cu el a mira. E abogado a bisa cu tabatin combersacionnan riba whatsapp, caminda V. a bisa cu e lo pasa serca B. Na opinion di abogado, B. tabata interpreta cos robez. E tabata kere cu ta relacion sexual V. tabata kier, cual no ta asina. Na opinion di abogado, B. den su adiccion tabata kier tin relacion sexual cu V. pero V. no tabata kier. Segun abogado, V. na dado momento lo a defende su mes contra B., caminda el a primi na B. su parti intimo y primi den B. su wowo. B. a reacciona violento e momento ey. Abogado ta haya cu B. a actua den defensa propio. Abogado a cuestiona e castigo hopi halto exigi door di Fiscal. E ta haya cu esey no ta cuadra cu e peticion di V. pa busca ayudo pa B. por rehabilita. Abogado ta haya cu mester yuda B. rehabilita pa su yiunan. Ta asina cu actualmente nan ta den procedura di divorcio.
E acusado B. na yoramento a bisa Hues cu el a pidi ayudo pero no a haya nada. El a bisa cu el a haya bati formal di 6 Polis. Ningun hende no ta wak esey.
Dia 30 Januari 2026 lo tin sentencia.
