Diahuebs mainta e homber Venezolano W.A.(33), su pareha e dama M.F. diaranson mainta Fiscal a baha pisa riba un trio cu Fiscal ta haya culpabel di importacion di casi 700 kilo di droga. E trio Venezolano ta consisti di e homber W.A. (33), su pareha, e dama M.F. y e homber V.L.(31) a presenta dilanti Hues pa e caso penal cu Ministerio Publico a cuminsa contra nan. Nan ta wordo sospecha di importacion di casi 700 kilo di droga riba 26 Augustus 2024.
SOLO DI PUEBLO por a compronde cu Fiscal a exigi 7 aña di prison pa A.W., 5 aña di prison pa V.L. y 4 aña di prison pa M.F.
22 BULTO DI DROGA CONFISCA
Hues a mustra cu Guarda Costa a notifica autoridadnan di Aruba cu nan a haya informacion cu di Venezuela ta organisando diferente importacion di lotenan grandi di droga pa Aruba. Polis a dicidi di tap e cellularnan di e homber W.A., su pareha M.F. y e homber V.L. A hasta instala aparato special den nan auto pa scucha combersacionnan.
Dia 25 Augustus 2024 pa 11’or di anochi, Guarda Costa a mira riba radar un boto for di Venezuela ta biniendo Aruba. Di biaha e avion di Guarda Costa a sali pa investiga y e tripulacion di avion a mira con bultonan di droga tabata wordo benta den laman.
Di biaha Guarda Costa a sali y a intercepta e boto caminda a detene 5 persona y a pisca un cantidad di bulto riba laman y tambe a haya den e boto. En total 22 bulto a keda confisca. Investigacion a mustra cu den e bultonan tabatin marihuana y cocaina. A confista 629 kilo di marihuana y 63 kilo di cocaina.
For di e combersacionnan cu Polis tabata scucha, a sospecha cu e trio W.A., M.F. y V.L. ta envolvi.
Hues a puntra W.A. si e tabata envolvi. Segun W.A. e no tin nada di haci cu e caso aki. El a bisa Hues cu e tabata sa cu famianan di dje cu ta ilegal, tabata bini Aruba. Hues a mustra cu Polis a scucha combersacionnan caminda W.A. tabata bisa pa ki ora asina nan lo mester yega. Tabatin palabra na unda na un cas na Calabas pa busca esnan ilegal. Hues a mustra cu ora Polis a yega, e cellular tabata completamente kibra pa no por saca informacion.
Hues a puntra e dama M.F. si e tabata envolvi. El a bisa cu e no sa di nada. Hues a mustra cu M.F. lo a papia tambe. Segun M.F., el a yuda W.A., door di contesta yamadanan y informa W.A. Esaki pasobra W.A. su cellular a baha. El a bisa cu W.A. no a bisa nada cu tin famianan ta bini y no sa cu un tio di W.A. tabata biniendo cu un boto. Segun M.F., el a puntra W.A. kico tabata pasando pero W.A. no kier a bis’e nada.
Hues a puntra V.L. si e tabata envolvi. Segun V.L., e no sa nada di droga. E unico cos cu e sa cu W.A. a pidi’e pa yuda cu su familiarnan cu lo bin y pa para cla pa busca nan. Segun V.L., e familiarnan ningun momento a yega y el a bay bek cas. Ta asina cu Polis a pone GPS na e Nissan March pa sa unda V.L. tabata. E movecionnan di e auto tabata mustra cu V.L. tabata vigila si tabata sigur cu e boto por yega. V.L. a desmenti esey.
Fiscal a splica cu e 5 personanan abordo di e boto a wordo condena entre 4 y 5 aña di prison pa importacion di cocaina y marihuana.
OTRO LOTE GRANDI DI DROGA
Hues a mustra cu ta sospecha W.A. ta tabata envolvi den importacion di casi 700 kilo di droga riba 9 July 2024. W.A. a desmenti esey. Hues a mustra cu Guarda Costa a mira boto ta navegando y Polis a bay na e beach, caminda a haya bultonan di droga. Riba e boto a haya un cellular satellite. Tambe den mondi a haya un otro cellular satellite. E total di droga confisca tabata 7 kilo di cocaina y 600 kilo di marihuana. Den vecindario di e beach, Polis a detene 4 persona. Algun di nan ya a wordo condena, mientras cu tin dos cu falta ainda pa nan caso bin dilanti. Segun W.A., e tabata pendiente pa busca un tio cu lo a yega. Hues a mustra cu Polis tabata scucha yamadanan di W.A. For di combersacionnan a haya sa cu e droga ta yega 9 July 2024 y cu ta W.A. tabata organiza esaki. Segun W.A., su funcion tabata pa busca ilegal. El a bisa cu e no tin placa y no tin auto grandi pa busca e lote di droga. El a bisa cu pa cada hende cu e busca, e tabata cobra 500 dollar. Di e forma aki, e tabata haya placa pa mantene su mes y su famia. El a bisa cu nan tabata yam’e pa mira su costa ta liber. E tabata bisa nan si tabatin Guarda Costa den laman of avion bulando.
FISCAL
Fiscal ta considera W.A. e organizador mientras cu V.L. tabata ehecuta. Pa loke ta e dama M.F., Fiscal a mustra cu M.F. tabata blo bisa cu e no sa di nada pero e mes tabata papia cu e capitan di e boto y tabata bisa con e situacion na Aruba tabata pa asina e importacion por tuma lugar.
El a mustra cu dia 9 Juli 2024 otro importacion sosode. A confisca 693 kilo marihuana y 7 kilo di cocaina.
Fiscal ta haya cu e trio aki ta complice di importacion di cocaina y marihuana. Fiscal a exigi pa W.A. 7 aña di prison, pa V.L. 5 aña di prison y pa M.F. 4 aña di prison. Ta asina cu M.F. a cuminsa yora ora el a tende e exigencia di Fiscal.
Despues di a scucha defensa di e abogadonan, Hues a sera tratamento di e caso y a bisa cu dia 28 Augustus lo tin sentencia.
