Awe mainta Hues di Corte di Husticia a trata e caso penal cu Ministerio Publico a cuminsa contra e hombernan di Haiti biba na Aruba W.E. (18) y R.M.B-A (21). Tur dos ta wordo sospecha di a haci atraco arma riba un pareha turista dia 3 September 2024.
SOLO DI PUEBLO por a compronde cu Fiscal a usa castigo hubenil contra W.E, kende e tempo ey tabatin 18 aña. Fiscal a exigi 2 aña di prison pa W.E. y 3 aña di prison pa R.M.B-A.
DOS TURISTA VICTIMA DI ATRACO ARMA
Den Corte, W.E. a admiti dilanti Hues di a haci e atraco arma cu violencia. El a bisa cu e dia ey anochi e tabata bou influencia di droga. W.E. a bisa cu e y R.M.B-A a bay core rond cu un amigo y na dado momento, ora nan tabata riba un parking lot, e amigo a bin cu e plan pa haci e atraco riba e pareha turista cu tabata canando ey banda. Segun W.E., e no a haci violencia pero a coy e tas di e turista cu tabata benta abao y core bay cun’e na e auto. El a bisa Hues cu e turista homber tabata riba suela. Segun W.E., e no tabata sa cu tin arma di candela y no a mira arma di candela. Hues a mustra cu investigacion di Polis ta mustra cu den e “trash” di e cellular di W.E. a haya potret di armanan di candela. Segun W.E., e no a saca potret di armanan pero por ta cu amigonan a manda potret p’e.
R.M.B-A. a bisa Hues cu e no a haci nada. El a bisa Hues cu e no a coy nada di e pareha turista. El a bisa cu ora el a mira cu nan a ataca e homber, el a spanta y a core drenta e auto. Hues a bisa cu e ta haya straño cu R.M.B-A. no a mira nada. E ora ey el a bisa cu el a mira movecionnan y a core bay bek den auto. Hues a bisa cu tin un testigo cu a bisa cu el a mira 3 homber a ataca e pareha turista. R.M.B-A. ta para riba cu e no a haci nada. Hues a mustra cu e testigo a bisa cu despues di e atraco, e 3 hombernan a core bay hunto. R.M.B-A. a reacciona cu esey no ta berdad.
Hues a bisa cu tin imagen di camera di seguridad caminda Polis ta mira 3 homber ta baha for di e auto y ta core bay den direccion di e turistanan. Na opinion di Hues, esaki ta cuadra cu loke e testigo a declara. Hues a remarca cu R.M.B-A. a bisa cu el a core bay auto siendo cu riba camera ta mira nan ta bay riba e turistanan. R.M.B-A. a bisa Hues cu el a core pasobra e kier a usa e wifi ey banda pa ora su amiga jam’e.
Hues a mustra un otro aspect esta cu e auto Toyota blanco cu e trio tabata aden tabatin 7 minuut ta core rond na e parkinglot. Hues a remarca, pakico a tarda asina siendo cu segun declaracion di W.E., nan a bay orina.
Hues a mustra cu e dama turista M. a bisa cu nan tabata cana y diripiente 3 homber a core bin riba nan. Un di nan tabatin un arma di candela. E atracador a bis’e pa keda keto, a ranca su cellular di dje. E turista a declara na Polis cu el a mira con e otro dos atracadornan, a ataca e homber y bent’e abao y bay cu su pertenencia. Hues a remarca cu loke e victima ta declara, no ta cuadra cu loke e dos sospechosonan a declara. E homber B. a bisa cu diripiente el a wordo gedal di lomba na su cara y el a perde conocimento. Polis a haya cellularnan y tabatin un papel cu nomber di W.E. Ta asina cu despues di mey ora di e atraco, a detene R.M.B-A. Ta asina cu nan tin 8 luna sera caba. Ta asina cu W.E. ta adicto na XTC y kier haya ayudo. R.M.B-A. tambe ta usa marihuana y XTC. E tambe kier haya ayudo. El a bisa cu e relacion cu su mama no ta bon. Nan no ta compronde otro y e ta haya cu lo ta bon pa haya ayudo.
FISCAL
Fiscal a bisa Hues cu W.E. y R.M.B-A ta bisa cu nan no sa nada di arma. Fiscal a remarca cu den cellular di W.E a haya un potret di un arma cu ta un rato promer cu e atraco a sosode. E ta haya legalmente proba cu e duo aki ta culpabel di atraco cu violencia. Fiscal ta haya hopi serio cu a atraca e pareha turista. Na opinion di Fiscal, ta parce cu e dos acusadonan tabata droga y tabata pensa solamente riba nan mes. Fiscal a tuma nan na malo pa loke nan a haci.
Pa cu e castigo, Fiscal a bisa cu e ta tene cuenta cu W.E. tabata 17 aña ora el a haci e atraco y tabatin casonan habri ainda na Ministerio Publico. Fiscal ta haya cu tanto W.E. como R.M.B-A. mester di guia manera nan mes a pidi. Fiscal a exigi pa W.E. 24 luna di prison di cual 6 luna ta condicional y cu 2 aña prueba, bou guia di Reclasering. Pa R.M.B-A., Fiscal a exigi 3 aña di prison di cual 6 luna ta condicional cu 3 aña di prueba y bou guia di Reclasering.
Hues, despues di a scucha defensa di e abogadonan, a cera tratamento di e caso y a bisa cu e ta bay studia e caso y dia 12 September 2025, lo tin sentencia.
