ORANJESTAD – Awe mainta Corte di Husticia a trata un otro caso lamentable di abusa. Aki ta trata di e homber H.(70) kende ta wordo acusa di a abusa di un mucha homber G.(11)
SOLO DI PUEBLO por a compronde cu Fiscal ta acusa H. di a viola G. entre Januari 2021 y Juni 2021. Hues a puntra H. si e acusacion ta berdad. H. a bisa cu no ta berdad. Hues a mustra cu den relato di Polis tin declaracion di e mama di G. riba 24 Juni 2021 kende ta bisa 2 luna pasa su yiu G. a bisa cu e no kier bay mas serca H. E mama a puntra pakico y G. a bisa cu e no kier bay mas. E mama a bisa cu e yiu a bisa cu e no kier biba mas y actua straño. E mama ta laga su yiu G. serca H. ora e ta bay traha. E mama ta casa cu e ruman homber di H.
Ta asina cu tin dos carta a bay na adress na e cas caminda ta bisa cu G. a wordo abusa door di H. y mester tuma accion. E mama a keda asombra pasobra e tin tur confianza cu H. kende ta duna les di steelband na Cas di Cultura. Ora e mama a confronta G. cu e cartanan, el a spanta. Despues el a conta e mama cu H. a abusa di dje. Esaki durante cu e mama tabata traha.
E mama a bay papia cu e yiu homber di H. y a mustr’e e envelopnan cu cartanan. Nan a bay serca H. y confront’e cu e cartanan. Despues di a lesa e cartanan, H. a keda cu cabez baha. E mama a puntra H. si el a abusa di su yiu G. y el a admiti di a abusa di G. E mama a reclama H. con ta abusa di G. E mama a bisa cu segun H. e no a forza G.
H. a bisa Hues cu e no ta corda cu e mama a puntr’e cu el a abusa di G. y e no a bisa cu el a abusa di G. Hues a remarca cu e yiu homber di H., kende tabata presente ora e confrontacion a sosode, a bisa cu H. a admiti. H. a bisa Hues cu e no ta corda kico el a bisa su yiu.
Hues a mustra cu tin raport di dokter cu a examina G. na September. Dokter a constata cu e mucha tin scheur cu ta señal di penetracion na su atras.
Psycologo ta bisa cu no ta mira cu H. tin problema mental y tampoco indicacion cu lo ta pedofile. Haya cu H. sa kico ta bon y malo. E ta ecocentrico y ta mira su mes y no ta mira consecuencianan di su actonan. Psycologo ta hay’e completo responsabel. E hecho cu e tabata wak pa e muchanan e chens tey cu e lo por haci algo asina. Mester guia intensivo di Reclasering.
Abogado mr. D.Croes di G., a reclama cu a haya e documentonan pa haya demanda un dia promer cu e caso no por por a haci tur cos manera mester ta. El a bisa Hues cu G. mester sigui guia largo y psycologico intensivo. E ta demanda 7500 pa mama cu a perde 3 luna di salario. Inmaterial 10 mil florin.
Fiscal ta haya un otro caso lamentable. Den casonan asina mester tin prueba di sosten. E ta haya cu e declaracion di e mucha ta confiabel. E ta haya cu H. a forza G. pa abusa di dje. H. tabatin 70 aña y e mucha 11 aña. El a haci mal uso di e situacion y tabata dificil pa e victima por a bay for di esaki. El a mustra cu tin sentencia Hof cu pa violacion ta 3 aña di prison.
Pa cu castigo tene cuenta cu casonan asina ta trece hopi dolor pa famia y shock comunidad. Ki castigo cu pidi lo no kita e dolor y sentimento di e victima. Fiscal a exigi 6 aña di prison. El a pidi disculpa cu e mama di e victima a haya documentonan pa haci demanda laat. Haya cu no tin documentonan pa prueba cu e mama a perde su trabou. Den un caso civil ta mas na su lugar. Pa loke ta daño inmaterial, ta un hecho cu e victima ta sufri daño. El a pidi pa aproba 5 mil florin y gastonan di abogado. E resto el a declara no admisibel pa asina e mama por haci un caso civil.
Hues a sera tratamento di e caso y a bisa cu dia 18 Februari 2022 lo tin sentencia.
