Dia 18 di december proximo pa 8’or y mey di mainta, lo dicta sentencia contra Speed Andrade den cuado di e caso penal conoci como “New York’. Ministerio Publico a pidi hues pa duna ordo pa manda Speed KIA inmediatamente na momento di dicta sentencia.
E caso aki, trata den Corte di Prome Instancia dia 15 di november 2024, ta envolve varios periodista, fuera di Nelson “Speed” Andrade, acusa di corrupción activo di un funcionario publico, complicidad den violacion di secreto oficial di trabao y participacion den un organisacion criminal entre januari 2021 y maart 2023.
Fiscal a destaca e gravedad di e delitonan cometi, na cual ta inclui soborno y abuso cu ta compromete e confiansa publico den e institucionnan. E situacion a surgi inicialmente cu e condena di e agente policial V. dia 8 di december 2023. V. a ricibi un pena di 16 luna di prizon, di cual 8 ta condicional, fuera di un prohibicion di tres aña pa eherce como polis. E agente aki a facilita e sospechosonan acceso na comunicacion interno mediante radio di polis, loke no solamente a viola e privacidad di e ciudadanonan, sino cu tambe a pone e otro servicionan di emergencia na riesgo.
E fiscal a enfatisa cu ningun periodista ta riba ley y cu acto manera soborna un polis no ta relaciona cu libertad di prensa. P’esey a pidi un pensa di 24 luna di prizon incondicional p’e sospechoso Speed Andrade, kende mester bay KIA di biaha despues di e sentencia.
E audiencia p’e ceramento di e investigacion y e dictamento di e sentencia lo tuma luga diaranson awo, dia 18 di december.
