Mas dentencion di caso Flamingo
E conocido comerciante Fito Croes, cu ta negosha den realestate, compra y benta di tereno y condominiums a wordo deteni dialuna mainta tempran na su cas na Noord. Tur indicacion ta mustra cu husticia ta druk bezig cu caso Flamingo, unda ta investiga si durante 2017 pa 2019, Ex Minister Otmar Oduber a otorga tereno comercial, na forma ilicito.
Ya caba Sra. Aysha Esser a keda deteni y awor ta Fito Croes. Fito Croes ta ruman homber di Ex minister Tico Croes como tambe ex lider di AVP.
Fito Croes tin hopi aña ta negosha den desaroyomento di edificio of proyectonan di cas. Na Eagle Beach recientemente el’a desaroya mas cu un proyecto. E tin contactonan amplio na New York y na Venezuela unda e ta logra bende tur e apartamentonan tipo condominium. Aparentemente e lo a haya tereno y awor ta bao investigacion si encaso el’a paga bao mesa pa logra yega na esaki.
Informacion cu SOLO DI PUEBLO a haya ta bisa cu tabatin dos inval. Uno na cas di Fito Croes y otro na su oficina.
