Dialuna mainta durante conferencia di prensa di gobierno, Minister di Husticia mr. drs. Arthur Dowers, encarga tambe cu e cartera di Integracion, a anuncia cambio temporal pa locual ta trata e proceso di admision na pais Aruba.
Minister di Husticia, DIMAS y demas stakeholders, pa algun tempo caba ta trahando riba un maneho di flexibilisacion temporal di e proceso di permiso. Despues di algun luna di preparacion administrativo y dialogo estrecho cu diferente gremio cu a duna nan cooperacion y a forma parti di discusion, awe a anuncia con ta bay maneha e aplicacion di e flexibilisacion presenta.
Funcionamento optimal di e mercado laboral tabata un di e puntonan principal cerca e gremionan y den dialogo a yega na palabracionnan concreto pa garantisa esaki. Minister Dowers a gradici entre otro e gremionan mas grandi den sector priva, organisacionnan social, ATA, ATIA, AHATA, CUA, Camara di Comercio, como tambe e organisacionnan di e Consuladonan di e paisnan aki na Aruba.
Cu e maneho nobo temporal, ta duna personanan cu ta trahando aki den forma ilegal, of personanan cu ta riba nos isla cu status ilegal y cu por yega na un dunado di trabou, maske cu a surpasa nan estadia riba nos pais, no lo bay nenga nan e peticion pa yega na un permiso, con tal cu te cumpli cu e rekisitonan.
Tur persona cu ta riba nos isla prome cu e fecha di 1 di juli 2025, lo por solicita pa un permiso temporal di trabou. Tin rekisito cu lo mester atene na dje, igual cu permisonan anterior. Unico diferencia cu no ta bay exigi pa e persona bandona nos pais mientras ta warda contesta riba su peticion, tampoco nenga e permiso debi cu a surpasa fecha di estadia legal riba nos isla.
Minister di Husticia Arthur Dowers a enfatisa cu e meta principal di e maneho di flexibilisacion, ta pa legalisa personanan cu ta riba nos isla na e momento aki y no pa trece ningun hende di exterior awo akinan.
E beneficionan di e maneho aki ta pa nan cumpli cu e regla/leynan vigente di nos pais, aporta na e premies cu tin cu aporta na dje y na beneficio di nos pais. Hunto tin cu bay traha na progreso di nos pais y ta spera di por conta cu e cooperacion di tur dunado di trabou.
Ademas di e legalisacion den mercado laboral, a adapta tambe e maneho riba reunificacion familiar, caminda cu antes esnan cu a ricibi permiso pa nan partner pero cu prohibicion di por traha, awor lo haya e oportunidad pa aplica y drenta e mercado laboral.
Esaki ta conta tambe pa studiantenan, mayor di edad, cu awo por drenta mercado laboral, banda di nan estudio.
Flexibilisacion ta conta tambe pa persona cu tin riba cinco permiso pa por solicita pa un permiso di maximo cinco aña pa asina yega na un firma liber. Ta haya e oportunidad di por paga pa esaki den un solo biaha na un tarifa reduci y asina por traha cerca cualkier otro dunado di trabou.
E posibilidad ta habri pa por aplica pa un permiso pa mas di un aña, y ta encurasha tur dunado di trabou pa haci uzo di e oportunidad aki y asina garantisa un relacion di trabou mas stabil, mehora e parti administrativo y reduci e presion riba e organisacion.
Minister Dowers ta invita pa subi e pagina di www.dimasaruba.aw y www.gobierno.aw y Gabinete AVP-Futuro riba Facebook, pa informacion veridico.
