Manera nan ta bisa si tin 1% di posiblidad mester sigui hasi esfuerso y empeño pa mira si por logra.
Tabata aña pasa 2024 cu director di Departamento di Agricultura, Cria y Pesca, Santa Rosa sra. Nathalie Maduro a hasi un bishita di trabou na Rotterdam, Hulanda caminda ela bishita un ganaderia cu ta construi riba awa. Un Floating Farm cu ta produci keeshi. Sra. Maduro a haya esaki hopi interesante. Aki ta caminda tur cos a cuminsa pa mira kico por ta e posiblidadnan pa logra un proyecto di e magnitud aki pa Aruba. Den trancurso di siman pasa gobierno di Aruba pa medio di Santa Rosa a extende un invitacion na esnan responsabel pa e Proyecto aki pa bishita Aruba pa un introduccion y presentacion. Aki ta caminda cu a invita sr. Peter Wingerden cu ta e CEO di e Floating Farm. Pa sondia e posiblidadnan aki pa Aruba a invita strategicamente varios departamento di gobierno y tambe stakeholdernan pa por forma parti di e session di introcuccion y presentacion cu a tuma lugar diabierna ultimo. E mainta a cuminsa cu palabra di bonbini na tur presente di parti sra. Nathalie Maduro director di Santa Rosa. Despues a continua cu e introduccion y presentacion di sr. Peter Wingerden cu a bai hopi detaya den su presentacion. A splica entre otro kico ta e tipo di animalnan por wordo uza pa e farm aki. Con e structura ta pa por ta riba awa. Si por adapta algo asina pa Aruba kisas uzando otro tipo di animalnan. Su locacion tambe lo ta uno di interes pa por desaroya e structura y asina por sigui mencion. Por a admira varios hefe di diferente departamento di gobierno cu tabata presente pa pone nan mes na altura di e Floating Farm. Diferente stakeholder tabata presente di cual mayoria a haya e presentacion hopi interesante. Despues di e presentacion tur invitado tabata tin amplio oportunidad di hasi pregunta riba un of otro inkietud.
Riba combinacion di foto por admira e acontecimientonan cu a tuma lugar y invitadonan presente intercambiando di idea y opinion riba e presentacion di Floating Farm y su posiblidad di existencia na Aruba y su beneficionan.
Na nomber di Departamento di Agricultura, Cria y Pesca Santa Rosa nos ta gradici tur esnan cu tabata presente pa nan aporte cu idea y/of opinion na e introduccion y presentacion pa prome biaha Floating Farm na Aruba. Gradiciendo tambe sr. Peter Wingerden CEO di Floating Farm Rotterdam, Hulanda pa exitoso y interesante presentacion.
