Fin di siman mi tabatin e honor di bishita e charla interesante den sala principal di Biblioteca Nacional di Aruba. Fundacion Lanta Papiamento (FLP) a tene un anochi di charla titula “Ortografia di Papiamento: causa y consecuencia.”
E orador tabata sr. Ramon Todd Dandaré Mag. Ling. y e mc e presidente di directiva di Unoca Shahayra Croes.
E anochi aki Ramon Todd Dandé a presenta e historia di e ortografia di Papiamento desde aña 1775, aña cu e prome palabranan na Papiamento tabata skirbi, te cu awe den 2026 y tambe e echo cu ta existi dos ortografia di nos idioma. Parti di esaki tabata tambe con Hulandes tabata imponi riba nos pa nos colonisadonan, e escoho di e parti fonologico door di e islanan Corsou y Boneiro y etimologico na Aruba. A uza e escogencia di Aruba pa e parti etimologico, como rol importante den nos lucha pa Status Aparte.
Den un ambiente agradabel publico por a haci pregunta y discuti riba e desaroyo y futuro di nos idioma. Sr. Todd Dandaré a finalisa su presentacion cu su deseo y su conseho pa e desaroyo di Papiamento declarando cu e no lo ta contra pa scolnan di Aruba, Boneiro y Corsou presenta les y siña nos muchanan tur dos forma di Papiamento esta e fonologico y esun etimologico.
E sala tabata yena cu personahenan di comunidad di Aruba cu ta sostene FLP den su lucha pa nos idioma. Por a mira presencia di entre otro Astrid Britten, Olga Buckley, Joyce Pereira, Xiomara Maduro, Desiree Correa, Amy Lasten, Rubia Bernabela, Trudy Hassel, Lupita Bernabela, Olivia Benschop-Erasmus, Araisa Todd, Marvin Odor, Michael Paesch y Glenda Maduro.
Sra. Joyce Pereira tambe a dirigi palabra na e publico gradiciendo un y tur pa e sosten y tambe invita un y tur cu ta sinti un conexion cu Papiamento, pa uni nan mes na FLP.
Ta di admira cu tanto sr. Todd Dandaré como FLP ta keda cu e lucha na bentaha di nos idioma cu, na mi opinion, ta un di nos tesoronan mas unico y grandi cu nos por blof cu ne unda cu nos yega na mundo.
