FONTEIN KLEUTERSCHOOL A RICIBI BISHITA DI PROME MINISTER WEVER – CROES

Prome Minister Evelyn Wever – Croes:

Den cuadro di apertura di aña escolar 2022-2023

ORANJESTAD – Diaranson a tuma luga apertura oficial di aña escolar 2022 – 2023, den cuadro di esaki Prome Minister Evelyn Wever – Croes a inicia su dia cu un bishita na Fontein Kleuterschool na San Nicolas. Mester menciona cu durante e ultimo 3 añanan, Fontein Kleuterschool a haci hopi trabou di remodelacion y construccion. Prome Minister tabata desea di mira e trabounan cu a wordo realisa, y expresa cu e scol a keda hopi bunita. Ta gradici DOW pa e bunita trabou y tambe henter e staf di scol.

Premier Wever – Croes a expresa cu manera cu el a yega na Fontein Kleuterschool el a sinti e  animo sumamente positivo. “E ambiente ta ideal pa muchanan di kleuter por haya nan enseñansa y e entusiasmo di e maestronan y di e alumnonan a haci un impresion grandi riba mi.” 

Por ultimo, Prome Minister a desea henter e team di Fontein Kleuterschool hopi exito cu e aña escolar aki, guiando y yudando mayornan den educacion di e muchanan. Y cu mayornan tambe ta aprecia tur e trabou cu ta wordo haci di parti Fontein Kleuterschool. ‘Mi ta tur confiansa cu e aña escolar ta bay ta un sumamente exitoso’, Prome Minister Wever – Croes a termina bisando.