Corte di Husticia recien a rechaza e demanda di Island Finance Aruba contra un cliente. Island Finance (IFA) a cuminsa e caso contra e homber M., pa no ta cumpliendo cu e pagonan palabra.
SOLO DI PUEBLO por a compronde cu Hues a cuestiona e comportacion di IFA, cu ta cobrando interes mas halto cu ley ta stipula. Hues a mustra cu na 2020 caba Hof di Corte Superior, a hala atencion di IFA pa esaki.
Ta asina cu e homber M. a cuminsa un caso contra su ex señora Q. pa M. haya liberacion di pago. Tur e casonan aki a wordo trata hunto.
IFA A MANDA COBRA CLIENTE
E caso ta relaciona cu IFA a demanda no cumplimento di M. cu e pagonan palabra. IFA, pa medio di su abogado a manda M. carta pa paga un suma cu ta mas cu loke M. realmente ta debe. IFA a mustra cu e suma a bira mas halto, pasobra a bin acerca e multa cu ta palabra, gastonan extra na oficina y paga abogado.
HUES TA BATI RIBA DEDE DI BANCO
Hues, den su evaluacion di e caso, ta bati riba dede di IFA mustrando cu na April 2020 caba, Hof di Corte Superior ta hala atencion di IFA pa ta cobrando interes mas halto cu segun ley ta stipula pa banconan. Hof ta mustra cu si ta cobra interes mas halto cu 27 %, esaki ta invalido door cu e ta contra e bienestar di Aruba y orden publico. Hues den su evaluacion ta mustra IFA mester atene su mes na su obligacionnan cuidadoso. Hues ta haya cu IFA no tin derecho di haya e interes di pago cu e ta exigi.
BANCO NO POR COBRA INTERES EXAGERA
Hues ta mustra cu segun e sentencia di Hof, e interes cu IFA a stipula na 2019 tabata 5 % mas halto cu e tarifa cu tin y a declara e prestamo invalido.
Hues ta mustra cu e sentencia di April 2020 di Hof, ta pa proteha tur esnan cu ta bay fia placa na banco, cu nan no ta haya nan cu obligacionnan financiero mucho pisa.
Hues ta mustra cu e sentencia aki ta conta pa tur otro banco na Aruba, caminda no por surpasa e maximo di 27 % di interes. Hues ta haya cu IFA mester a revisa su interes halto cu el a exigi di e homber M. Hues ta haya cu IFA mester sa masha bon cu e interes cu el a fiha pa M. no ta valido.
RECHAZA DEMANDA
Hues a haci un calculacion di e demanda di IFA riba e debe cu M. lo tin cu paga. Hues ta mustra cu e placa cu segun IFA, M. debe, a wordo cubri caba na 2023. Hues a rechaza e demanda di IFA y a rechaza e demanda di M. contra su ex señora.
