Scirbi pa Pastor Marcel Balootje.

CANA  DEN  FE  Y  OBEDENCIA  NA  DIOS.

Cana den Fe y obedencia na Dios ta nifica , pone Dios na prome lugar den nos bida, y para firme riba su Palabra, aunke con dificil y scur e situacion mundial ta birando.(Mateo 24:13).

Palabra di Dios ta bisa nos cu sin Fe ta imposibel agrada Dios, pasobra esun cu ta bini serca Dios mester kere cu E ta,y cu E ta esun cu ta recompensa esun cu ta busc’E.

Pa nos experiencia cosnan grandi den Señor nos mester tin un bida cu ta agrada Dios, y esey ta nifica cu nos mester cana den Fe y obedencia na Dios.

No ta pornada e palabra di Dios ta bisa, cu tur locual nos sembra nos ta cosecha, y cu Dios no ta laga ningun hende haci bofon di dj’E.( Galationan 6:7-10).

Pakico boso ta yamami Señor, Señor y no ta haci locual mi ta bisa.(Lucas 7:46).

Ta berdad cu nos mester yama riba di Señor den tur circumstancia, pero ora nos yama nos tin di kere y obedece , pasobra yama so no ta suficiente.

E ciego Bartimeo a yama Hesus yui di David pa asina e por a ricibi recobra su bista, y e a kere cu Hesus por a dune su bista bek, y no solamente e a wordo sana pero tambe e a wordo salba.( Marco 10:46-52).

Ora nos ta pidi algo na Dios nos mester pidi cu Fe, pasobra Fe ta move man di Dios, y tur cos ta posibel pa esun cu ta kere.

Nos mester tin un bida di oracion, cual ta nos medio di comunicacion cu Dios, nos mester pordona pasobra esey ta haci nos curason limpi, y kita tur peso, wardando riba nos bendicion.( Marco 11:24+25).

Ora nos pordona nos ta demostra obedencia na Dios, y nos ta kibra tur strategia diabolico, pasobra mientras cu nos no pordona, e enemigo tin motibo pa acusa nos dilanti di Dios.

Pasobra nos ta cana pa medio di Fe, no pa medio di bista.( 2 Corintionan 5:7).

No ta bon pa laga emocion domina nos bida , pasobra emocion, no por cambia nos situacion, pero hopi biaha emocion ta complica e asunto mas pa nos. Emocion ta pusha nos pa haci cos den nos propio forsa.

Emocion ta temporal, pero nos fe den Dios, ta tur locual nos mester, pa nos ta obediente y siña warda riba Dios.

Stimanan si nos curason no ta condena nos, nos tin confiansa dilanti di Dios.( Nos tin di tene cuenta cu nos mester confesa nos picanan na Dios, pesey ta haci nos comunicacion cu Dios mas fuerte).Y kico cu nos pidi nos ta ricibi for di dj’E. Pasobra nos ta warda Su mandamentonan y ta haci cosnan cu ta agradabel den Su bista. Y esaki ta e mandamento pa nos kere den e nomber di Su Yiu Hesus Cristo, y stima otro, mescos cu E a ordena nos.( 1 Juan 3:22-23). E cosnan aki mi ta scirbi boso cu ta kere den e nomber di e Yiu di Dios, pa boso por sa cu boso tin bida eterno.y esaki ta e confiansa cu nos tin Su dilanti, cu si nos pidi cualkier cos conforme Su bolontad, E ta

tende nos. Si nos sa cu e ta tende nos den tur loke nos pidi,nos sa cu nos tin e peticionnan cu nos a pidi di dj’E.

Nos tin di kere den e Palabra di Dios, biba e palabra, y haci e palabra, pasobra asina nos ta demostra pleno confiansa cu nos Dios ta tur cos pa nos.

Sinceramente, Pastor Marcel Balootje.   

LEAVE A REPLY

Please enter your comment!
Please enter your name here