Miembronan di Fraccion di AVP den Parlamento di Aruba Stephany Sevinger y Jennifer Arends-Reyes a tene un bishita di cortesia na Universidad di Aruba pa felicita e rector nobo, Sue-Anne Lee, cu su reciente instalacion como lider academico di e institucion. Den nomber di fraccion henter a extende palabra di pabien y deseo di exito na dje y henter su staff y mas di 800 studiante cu ta forma parti di e comunidad universitario.
Durante e reunion cordial, a trata varios punto importante relaciona cu e crecemento y futuro di Universidad di Aruba. Entre esey, a discuti riba e conexion cu Hulanda, un tema esencial pa fortifica colaboracion academico y intercambio di conocemento. Tambe a papia di proyectonan innovativo manera Shoco Wellness, cu ta busca pa promove bienestar y desaroyo integral pa studiantenan.
Otro topiconan trata a inclui e maneho di idioma, exito academico, e programa di Academic Foundation Year, y diferente reto y colaboracion cu por sigui fortifica e base di e institucion.
AVP a pone enfoke riba importancia di crea oportunidad pa e studiantenan local, pa cu nan por logra nan diploma aki na nan mesun pais, sin perde conexion cu oportunidadnan di crecemento na Hulanda y internacionalmente.
E fraccion ta consciente di e gran importancia di sinergia entre institucionnan educacional y e apoyo di e rama legislativo di gobierno, pa asina hiba un sistema academico nacional exitoso y sostenibel. Un colaboracion estrecho entre Universidad di Aruba, e gobierno y Parlamento ta clave pa garantisa cu educacion ta sigui un prioridad pa nos futuro.
“Nos ke mira nos universidad sigui crece y ofrece educacion di calidad pa forma e proximo generacion di profesionalnan Arubiano. Hopi di nos studiante ta sigui studia na Hulanda, pero nos kier motiva nan pa bolbe y contribui cu nan conocemento na desaroyo di Aruba,” segun lider di fraccion, Jennifer Arends-Reyes.
E reunion a termina den un ambiente di respeto y colaboracion, confirmando cu pa AVP educacion y formacion humano ta e base pa un Aruba mas fuerte y sostenibel.
