Representantenan di fraccion di AVP den Parlamento di Aruba a atende e presentacion final di e CORVI (Climate and Ocean Risk Vulnerability Index) assessment, un estudio profundo riba riesgo climatico y vulnerabilidad marino-social-economico di Aruba.
E evento, organiza pa e National Climate Resilience Council of Aruba (NCRC), a marca e culminacion di un colaboracion intensivo di un aña entre Aruba y The Stimson Center den cooperacion cu y cu sosten di entidadnan manera AAA, Arubabank, AHATA, ATA, Banco Central di Aruba, Gobierno di Aruba, MetaCorp, SETAR, WEB y Utilities Aruba.
Durante e presentación a comparti dato importante y recomendacionnan clave pa fortalece e capacidad di resistencia climatico di nos isla. CORVI ta un herment cientifico y obhetivo, cu ta yuda identifica area vulnerabel y guia desaroyo di estrategia pa proteha Aruba contra impacto di cambio climatico y riesgo maritimo.
“Fraccion di AVP ta reconoce e importancia di esaki pa futuro sostenibel di Aruba y ta reconoce e esfuerzo conhunto entre sector publico y priva. Nos lo sigui comprometi pa traha riba un maneho ambiental cu ta basa riba evidencia, proteha bienestar di nos pueblo y nos naturaleza,” asina lider di fraccion, Jennifer Arends-Reyes a expresa.
Fraccion AVP ta invita tur ciudadano pa sigui ta interesa y participa den dialogo riba resiliencia climatico. E lucha contra cambio climatico ta un responsabilidad di nos tur.
