Diaranson ultimo Parlamento a trata e presupuesto 2026. Loke a hala hopi atencion tabata e falta di interes di e Parlamentarionan di AVP pa un topico asina importante. Di 9 parlamentario ta 1 so a hiba palabra.
Desde cu e reunion a cuminsa, ta parlamentarionan di MEP so tabata mustra interes den e reunion. Esnan di AVP no a firma e lista di orador y casi no tabata presente den sala. Fraccion di MEP a hala atencion di e presidente na algun ocasion.
Mescos a pasa den reunion di presupuesto supletorio di 2025, tampoco nan a mustra interes.
Ta obvio cu e demas 8 parlamentarionan no a ni studia e presupuesto 2026, y no tabata interesa pa haci ningun comentario, ni elogio. Algo nunca antes bisto. Semper parlamentarionan di coalicion ta defende e presupuesto. Pero den AVP no tabata tin e interes.
Parlamentario Jennifer Arends-Reyes ta e unico cu a hiba palabra, pero di forma hopi bruha.
Ta obvio cu AVP ta bou di hopi presion di e kiebro eminente cu Mike de Meza. E fraccion a laga nan colega Mike de Meza cay pa di dos biaha den un siman, y a scohe pa acomoda nan partner den coalicion Gerlien Croes.
Cualkier cu ta e motibo, ta un berguensa grandi e falta di interes di e parlamentarionan di AVP, cu unico cos nan ta haci, ta saca potret. Wat een afgang!
