Miembronan di Fraccion di AVP a participa recientemente na reunion di Comision di Salud di Parlamento di Aruba, caminda organisacion Movemento Ta Bida a presenta su vision, trabou y contribucion na bienestar y salud di comunidad Arubano.
Durante e presentacion, Sra. Madel Jacopucci y Sr. Rudy Leysner a duna miembronan di Parlamento mas informacion tocante e diferente iniciativanan cu Movemento Ta Bida ta desaroya, cu enfasis riba importancia di actividad fisico, prevencion y adopcion di un estilo di bida mas saludabel.
Un di e mensahenan central ta importancia pa adulto move por lo menos 30 minuut pa dia. Actividad fisico regular no solamente ta contribui na un mihor condicion fisico, sino ta forma parti di un enfoke preventivo pa promove salud y calidad di bida.
Jacopucci y Leysner a comparti tambe e trabou valioso cu nan ta realisa pa Aruba y a informa cu recientemente Movemiento Ta Bida a cuminsa ricibi subsidio di gobierno, loke ta contribui na continuidad di su labor den comunidad.
E reunion a ofrece espacio pa intercambio di idea y pa papia tocante diferente desafio cu ciudadanonan ta enfrenta den area di salud y bienestar, y con organisacionnan cu ta traha directamente den comunidad por aporta na solucionnan practico y efectivo.
Pa Fraccion di AVP, ta esencial cu parlamento mantene un dialogo directo cu organisacionnan cu ta activo den comunidad. Nan experiencia, trabou diario y contacto directo cu ciudadano ta ofrece informacion valioso pa por desaroya politica publico cu ta conecta mihor cu necesidad y realidad di pueblo.
“Salud no ta solamente trata enfermedad. Salud ta tambe inverti den prevencion, educacion y crea oportunidad pa hende di tur edad por keda activo. Si nos por stimula mas hende pa move y adopta habitonan saludabel, nos ta inverti directamente den calidad di bida di nos pueblo,” Fraccion di AVP ta enfatisa.
Fraccion di AVP ta gradici Movemento Ta Bida, Sra. Madel Jacopucci y Sr. Rudy Leysner pa nan presentacion, dedicacion y compromiso continuo cu comunidad Arubano.
Fraccion di AVP lo sigui sostene y promove iniciativanan cu pone prevencion y bienestar central, y cu ta contribui na un Aruba mas saludabel, mas activo y cu mihor calidad di bida pa tur ciudadano.
