Recientemente minister Wendrick Cicilia a informa Parlamento tocante e cambionan cu a wordo haci riba Dia di Betico na 2026.
Ta trata aki di e anuncio di e minister di labor Wendrick Cicilia cu pa medio di un decreto ministerial a wordo determina cu Dia di Betico e aña aki no lo wordo celebra riba 25 di januari, sino riba dialuna 26 di januari, basando riba un decision cu, segun e, a wordo tuma door di e reunion di Ministerraad di 19 di januari ultimo. E anuncio aki a causa hopi caos y frustracion na Aruba.
Falta di responsabilidad
Tras di e caos y frustracion tin un peliger serio, cu mester haya atencion. Con porta cu e Ministerraad actual, den cual casi tur minister ta hurista por a aproba esaki? Unda e minister di husticia a keda cu mester vigila pa decisionnan di Ministerraad ta den cuadro legal? Despues di dos dia minister Wendrick Cicilia mester a trek in su decision, bisando cu legalmente su decision tabata incorecto. Pa pueblo compronde, Sr. Cicilia mes ta un hurista!
Pregunta na Minister President
Pesey fraccion di MEP a entrega pregunta por escrito na minister presidente Mike Eman, esun cu ta encarga cu dirigi Ministerraad. E manera con e decision a wordo tuma ta lanta duda serio tocante con cuidadoso Ministerraad ta ora ta atende cu e estado di derecho. Of Sr. Cicilia a tuma e decision aki su so?
Segun Parlamentario Rocco Tjon, e forma con e proceso aki a wordo maneha ta duna señal di gobernacion amateurista. “Ta inaceptable cu un dia festivo fiha den ley por wordo cambia, y despues wordo retira paso cu despues nan a realisa cu huridicamente esaki no por. Esaki ta toca directamente e principio di siguridad huridico y bon gobernacion,” segun e Parlamentario.
Den su preguntanan na minister president, e ta pidi claridad, entre otro, si realmente e Ministerraad a tuma un decision, cual conseho y avisonan a sirbi di base pa e decision, y pa kiko no a wordo pidi conseho huridico prome cu a tuma e decision.
Amateur y fresco riba dje
Despues di Fraccion di MEP corectamente ta haci pregunta na Minister President y ta cuestiona e eror amateur di Minister Cicilia pa loke ta e cambio caotico aki, ainda Minister Cicilia tin curashi di falta pueblo respet yamando nos tur pa personanan cu “deficiencia di inteligencia”, den otro palabra, yama nos bobo. Minister Cicilia ta haci mane cu ta anos di MEP tin fout cu e (cu ta un hurista) a haci fout. Nos ta spera cu Minister Cicilia lo sa di disculpa su mes pa su expresionnan fresco y for di lugar!
Nos ta en espera di claridad
Cu e preguntanan haci Fraccion di MEP ta busca claridad riba e decisionnan interno di Ministerraad y pa evita cu situacionnan asina ripiti den futuro. “Goberna ta rekeri atencion, cautela, conocemento huridico y respet pa e estado di derecho. Esaki no por wordo trata manera un detaye secundario,” lider di Fraccion Evelyn Wever-Croes a duna di conoce.
E Fraccion ta exigi gobierno pa contesta e preguntanan den dos siman di tempo. Nos lo tene pueblo informa di e desaroyonan!
