Pa e reunion diahuebs caminda Gobierno a brinda informacion riba Rijkswet HOFA na stakeholders, nan a solamente invita fraccion di AVP y Futuro. Por a wak cu parlamentarionan di coalicion tawata presente, pero nan no a invita miembronan di MEP y PPA. Esaki a ser confirma pa presidente di Parlamento, sr. Sneek.
Banda di e hecho cu Gobierno no ta contesta pregunta y no a brinda informacion al respecto na Parlamento, awe un bes mas nan a mustra di NO ta transparente.
Fraccion di MEP ta lamenta e proceder aki pasobra nos a compronde cu durante di e session di diahuebs Gobierno di Aruba a malinforma stakeholders. “Obviamente si Parlamentarionan di MEP tawata presente lo nos a contradeci e malinformacion a traves di echo mes ora”.
Entre otro Prome Minister Mike Eman a splica cu ta e mesun profesionalnan tecnico nan a laga negocia, cu nos gobierno a laga negocia. Pues e no ta compronde dicon nos ta contra e resultado. E contesta ta simpel: e tecniconan a haci e trabou PREPARATIVO, despues di esey ainda e negociacionnan riba nivel di Gobierno mester a cuminsa. Nos mester compronde pues cu Mike Eman mes NO a negocia? Algo asina importante y e no a haci loke pueblo a spera di dj’e?
Un otro manipulacion ta momento cu el a bisa cu e ley aki lo scapa Aruba 300 miyon na interes, pero no ta duna ningun prueba ni calculacion. Nos tin lunas ta puntrando ta cuanto e suma ta cu lo spaar den interes. Un minister a bisa ta 30 miyon pa aña, otro ta bisa ta 50 miyon pa aña, awor ta bisa ta 300 miyon den 20 aña, pues ta 15 miyon pa aña. Kico e ta? Y dicon tanto secrecia?
Manera ta conoci tin dos conseho huridico riba mesa den cual ta trece claramente padilanti cu e ley di HOFA no ta bon, pasobra e ta viola nos Constitucion, e no ta combini Aruba, y cu e no ta necesario.
Fraccion di MEP ta lamenta e falta di transparencia di parti di Gobierno, y ta puntra su mes PAKICO tanto secrecia, y KICO MAS nan tin scondi?
