E nombramento reciente di Franklin Hoevertsz como miembro di e Conseho di Supervicion di Utilities Aruba N.V. a lanta hopi duda den comunidad. E pregunta ta simpel: Con serio nos ta tuma integridad den nos sistema di gobernacion?
Señor Hoevertsz no ta un cara desconoci. Den pasado e a wordo kita for di su puesto como director di mesun empresa gubernamental, despues di un investigacion interno cu a resulta den un kiebro di confianza. Tambe na Fundacion Cas pa Comunidad FCCA, el a sali riba manera similar pa motibo di iregularidadnan. Anto asina mes, e ta wordo nombra atrobe den un puesto cu ta pidi e nivel mas halto di integridad y obhetividad.
E pregunta crucial ta: Kico e tipo di nombramento aki ta bisa di nos cultura di gobernacion? Y ki mensahe nos ta manda na nos pueblo, nos hobennan cu ta aspira un trabou similar, nos empleadonan publico?
Cu bo por tin un historial di iregularidadnan, pero si bo tin e contacto politico correcto, bo por haya un puesto clave?
Bon gobernacion ta mas cu palabra riba papel. E ta un acto di responsabilidad. Un acto cu mester pone e interes di e pueblo prome. Aruba mester exigi mas. Mas transparencia, mas responsabilidad, y definitivamente mas integridad.
E momento a yega pa nos pueblo y nos lidernan politico traha cu transparencia y pa para e cultura di recompensa pa lealtad politico riba merito y bon conducta.
