Diasabra ultimo ex Minister President Evelyn Wever-Croes, hunto cu coleganan Xiomara Maduro, Shailiny Tromp-Lee y Edgard Vrolijk tabata tin un encuentro cu Minister President di Hulanda, sr. Dick Schoof y su conseheronan.
Durante e encuentro e Minister President di Hulanda a expresa palabranan di elogio pa e gobierno saliente, pa e recuperacion rapido di Aruba, y specialmente pa e maneho financiero hiba, cu ni Hulanda por replica. Loke e Minister President a enfatisa mas cu tur cos ta cu e debe nacional di pais Aruba, cu a redobla den e gobierno di AVP prome, awor danki na e maneho responsabel y prudente di MEP, ta yegando nivelnan internacional aceptabel. Y esey ta duna espacio pa e gobierno nobo por opera.
Tambe a delibera riba e desafionan geopolítico den nos region, y den resto di mundo. E desaroyonan ta preocupante y Aruba tambe mester cuminsa prepara pa e efectonan.
Un tema cu a bolbe bin dilanti durante e bishita di e delegacion hulandes ta e promesa di campaña di partido AVP y Futuro, pa converti e debe di Covid den un fondo di inversion. Esaki ta algo cu gobierno di MEP a purba na hopi ocasion, pero Hulanda durante e biahe aki un biaha mas a indica cu esey lo no ta posibel. Locual ta resalta ta cu Hulanda a informa sr. Eman cu esaki NO ta posibel ya prome cu eleccion caba, y despues di eleccion atrobe na varios ocasion. Sr. Eman (AVP) y Futuro a scohe pa toch sigui cu e promesa di campaña aki sabiendo cu e ta uno falso, pero un biaha mas e berdad ta alcansa e mentira.
E tabata un bon encuentro den cual un biaha mas a gradici ex Minister President Evelyn Wever-Croes pa e cooperacion di su gobiernonan cu Hulanda, y pa ta un digno representante di Reino durante e ultimo 8 añanan.
