Durante un reunion cu Aruba Sport Unie dia 1 di april 2026 den Parlamento, a sali na cla cu e proyecto deportivo multifunctional cu tabata proyecta banda di Compleho Deportivo Betico Croes na Santa Cruz a wordo para. E proyecto mester a bin riba e tereno pabou di e compleho na Santa Cruz, cu veld di futbol di yerba, atletiek baan, veld di basketball 3×3, baseball 5 y beach tennis. Un tremendo proyecto cu, si gobierno no a cambia, awe lo tabata cla caba.
E proyecto aki a wordo prepara completamente pa ex Minister Endy Croes, durante Gabinete Wever-Croes 2, y fondonan a wordo aloca te cu material deportivo a wordo cumpra, cu awor ta bayendo perdi. Esaki ta un situacion hopi serio pa desaroyo di deporte na Aruba.
Awor, e proyecto ta para, riba orden di Minister Gerlien Croes y e material deportivo ta keda warda den container cu ta cabando cada dia. Containernan ta den mal estado, material ta bai atras, y esaki ta nifica destruccion di capital di mas cu mei miyon florin di placa publico. Esaki ta inaceptabel. Y algo sigur cu e minister por wordo teni responsabel p’e.
Mas preocupante ainda ta cu cada biaha cu Aruba Sport Unie kier desaroya e tereno, semper tin obstaculonan. Un di e argumentonan cu a wordo usa ta cu tin supuesto descubrimientonan arqueologico. Pero e mesun argumento aki ta wordo usa pa mas cu dies aña, y te ainda no tin ningun conclusion cla, ningun solucion, ni ningun direccion definitivo. No por ta asina cu despues di dies aña ainda no tin claridad. Si realmente tabatin un asunto arqueologico serio, investigacion mester tabata cla caba hopi tempo, y e parti di e tereno cu no tin problema mester a wordo desaroya caba.
Deporte na Aruba no por sigui wordo atrasa pa motibo di envidia, burocracia, falta di decision of falta di vision. Nos hubentud mester facilidadnan deportivo, nos federacionnan mester espacio pa train, y nos pais mester inverti den deporte pa salud, disciplina y desaroyo social.
Mester remarca cu e mesun Minister Gerlien Croes aki a para proyecto di un scol na Paradera, y despues a para e proyecto deportivo aki na Santa Cruz. Su colega Minister Geoffrey Wever a declara cu e ta contra comercio den Savaneta, Santa Cruz y Paradera. Ta kiko e ministernan aki tin contra e pueblo pafo di Playa y San Nicolas?
Esaki no ta solamente un tema di un tereno na Santa Cruz. Esaki ta un tema di vision pa deporte na Aruba. Esaki ta un tema di respet pa organisacionnan deportivo. Y esaki ta un tema di responsabilidad cu placa di pueblo.
Fraccion di MEP den un carta oficial di Parlamento a urgi e minister responsabel pa duna claridad, pa tuma responsabilidad y pa busca un solucion rapido pa e proyecto aki por sigui. Deporte di Aruba merece miho. Nos deportistanan merece miho. Nos hubentud merece miho.
