Fraccion di Movimiento Electoral di Pueblo (MEP) a manda awe un carta formal na Presidente di Parlamento di Aruba, den cual nos ta expresa nos preocupacion grandi tocante un comunicado di prensa sali pa fraccion di AVP dia 12 di juni 2025.
Den e comunicado aki, AVP ta hasi un “yamada formal” na Ministerio Publico pa e investigacion penal contra nan colega Mike de Meza wordo lanta “di un manera rapido, transparante y honesto.” Fraccion di MEP ta considera e tipo di expresion aki como un metemento indebido den e trabou independiente di un organo vital den nos estado di derecho.
“Principio di separacion di poder (Trias Politica) no ta opcional, sino esencial pa un democracia funciona,” segun lider di fraccion Evelyn Wever-Croes. “Nos como Parlamento mester percura cu no ta pone presion politico riba Ministerio Publico, pa proteha e confiansa di pueblo den nos sistema di husticia.
Fraccion di MEP ta considera e expresion di AVP como no solamente inapropia, sino tambe dañino pa e imagen y integridad di e Parlamento di Aruba. Den e carta, Fraccion di MEP ta pidi na Presidente pa trece e asunto aki na atencion di e lider di fraccion di AVP, pa laga cla cu metemento politico den proceso hudicial no por ta permiti.
“Ta nos deber como Parlamento pa ta para ariba di politica partidista ora cu ta trata di e fundamento di nos estado di derecho,” segun Wever-Croes. “Esey mes ta loke pueblo Arubano ta spera di nos y nan tin rason.”
