Diasabra december 3, a habri cu e noticia cu Merca a haci un atake extraordinario na Venezuela cu bombnan, den cual a captura Presidente Maduro y su esposa, y a hibanan Merca pa asina enfrenta cargonan hudicial.
Mirando cu gobierno mes no ta duna informacion, Fraccion di MEP a insisti pa un reunion urgente cu gobierno diasabra mainta mes. Despues di e reunion ey, lider di Fraccion di MEP a comparti mas informacion cu comunidad.
Kico ta e efectonan di e situacion aki pa Aruba?
Lider di Fraccion di MEP Evelyn Wever-Croes ta splica cu e prome efecto ta e hecho cu autoridad mericano a emeti un aviso serio na tur e aerolineanan mericano pa no bula den e espacio aereo di Aruba. Basa riba e notificacion aki, varios otro aerolineanan a sigui e conseho aki tambe. Consecuentemente mas di 40 vuelo cu mester a drenta Aruba diasabra 3 januari, a cancela. Hopi turista cu mester a debolbe nan pais riba e dia aki a keda pega na Aruba, y hopi Arubiano cu mester a bolbe bek Aruba a keda pega den exterior.
Parlamentario Wever-Croes a indica cu e situacion aki, un biaha mas lo bay exigi un esfuerso grandi di gobierno y di e comunidad di Aruba. Lider di fraccion di MEP Evelyn Wever-Croes a haci un apelacion na Gobierno pa pone un punto di contacto na unda nos hendenan cu ta pega den exterior por yama y haya guia y conseho di kico nan por haci, cuanto tempo e situacion aki lo dura, y con nan lo por haci pa regresa Aruba bek. Gobierno lamentablemente no a pensa di hasi algo asina, pero a priminti di bai pensa riba dje.
Pa esnan cu ta pega na Aruba y mester bay bek nan pais, ohala cu via Aruba Tourism Authority por yuda nan.
Esaki ta e prome impacto di e situacion aki y e tin Fraccion di MEP den Parlamento su atencion pasobra e ta afecta e pilar economico mas grandi di pais Aruba cu ta turismo.
Gobierno a informa cu tin suficiente “stock” di cuminda pa 3 luna, tin suficiente stock di gasoline, y di jefuel tambe. Pues cu esaki no tin motibo pa drenta panico.
Evelyn Wever-Croes ta enfatisa riba e gravedad di e situacion, y cu nos no mester tuma e situacion manera un “joke” of wega. El a indica cu aunke e situacion ta uno serio, comunidad mester keda trankil y no bay den panico.
“Nos na Aruba no por influencia kico ta bay pasa. Mientras nos ta warda con e situacion ta transiciona na Venezuela, mi ta pidi cada ciudadano pa keda trankil y pa sigui duna tur nan esfuerso pa sigui hiba nos pais padilanti. Tambe mi ta pidi boso tur pa uni den oracion pa bin un resolucion pronto pa Venezuela, Aruba, Boneiro y Corsou” Evelyn Wever-Croes a expresa.
