Den Parlamento di Aruba a surgi un debate na momento cu parlamentario Mike de Meza a cuestiona e gobierno di AVPFuturo, si di berdad nan ta haciendo algo drechi pa San Nicolas.
De Meza a elabora riba e falta di decision di gobierno AVPFuturo cu ta frenando e desaroyo di e hotel Secrets cu ta e unico desaroyo real den San Nicolas, pero cu no ta hañando cooperacion di gobierno. Parlamentario De Meza tambe a critica severo e falta di vision di e Gabinete di Mike Eman riba San Nicolas, den e maneho nobo di Minister Geoffrey Wever.
Minister Geoffrey Wever den su maneho a duna San Nicolas y Playa e mesun incentivonan fiscal, y esaki ta algo cu Parlamentario De Meza no ta di acuerdo cune. El a indica cu si San Nicolas y Oranjestad haña e mesun incentivo fiscal, e inversionnan nunca lo yega San Nicolas. “No duna San Nicolas un dode mus, San Nicolas merece un pakete fiscal, duna San Nicolas locual e mester pero no hinke den un bachi den cual Oranjestad ta haña e mesun incentivonan, pasobra esey lo no traha, tabata su palabranan. Na final tambe el a expresa di ta spera cu su gobierno AVPFuturo realmente cuminsa traha pa San Nicolas, sino e mes lo tuma pasonan.
