Den un amienda presenta pa fraccion di PPA den Parlamento, Otmar Oduber a boga, un biaha mas, pa un Pardon Regeling pa legalisa 10 mil persona indocumenta na Aruba. E personanan aki ta forma parti di e forsa laboral na Aruba pero no ta contribui na e diferente fondonan, manera tur otro trahador.
E ta propone pa bin cu un tipo di boet di mil Florin cu lo representa 10 miyon Florin den un periodo di 3 luna, cual lo ta e termino cu e Pardon Regeling aki lo ta vigente. E suma aki, fraccion di PPA ta propone pa bay pa cuido di frontera directamente y evita cu hendenan por sigi yega Aruba den forma ilegal debi na e regeling aki. Cu e fondonan aki lo por percura pa tin personal, drones y ekiponan necesario pa para entrada di hendenan den forma ilegal via lama na nos isla.
Ta importante pa atende cu e situacion aki mas pronto cu ta possible pasobra e instancianan cu ta encarga cu esaki ta indica cu tur luna tin entre 4 pa 5 barco ta drenta, ya cu nan ta haya tur siman hende nobo. E urgencia ta mas grandi ainda, si tene na cuenta cu e ayudo cu e instancianan aki tabata haya for di gobierno Mericano a wordo corta. Esnan riba nos isla ya ta forma parti di e forza laboral pero no ta contribui na ningun instancia. Nos economia ya absorbe gran mayoria di esnan sin documento aki y nan tin unda pa biba y ta forma parti di e economia na un manera informal. Realidad ta cu ademas di esnan ya riba nos isla, ainda tin un necesidad grandi na mas trahador. Hopi comerciante ta sufriendo y nos economia lo sinti e efectonan negativo di esaki si nos no actua awo. Claro ta e momento oportuni pa implementa un maneho adapta pa esnan cu ta bai worde legaliza como tambe esnan cu lo mester bin ainda. Ademas di cumpli cu e screening y documentonan rekeri, ta bon pa introduci exigencia y condicionan manera cursonan di Papiamento, Ingles y programanan di integracion manera entre otro un certification program. “Aruba ta perdiendo pa aña rond di 26 miyon florin cu lo drenta den caha di AZV y rond di 37 miyon den caha di SVB, pa no papia mes di otro contribucionan cu no ta worde haci na e momentonan aki, mientras pa aña ta calcula cu Aruba ta perdiendo un minimo di 50 miyon cu nonta circula den nos economia”, asina Oduber a trece dilanti.
