Como parti di e Common Good Conference di e siman aki, varios fundacion y organisacion local ta comparti con nan ta practica e concepto di common good pa algun aña caba riba Aruba. Un di nan ta, Fundacion Aruba Bevolkingsonderzoek, un fundacion cu ta enfoca riba prevencion y concientisacion riba diferente tipo di cancer.
Segun e directora di e fundashon Nanine Ponson, ABO ta contribui na e bon comun pa medio di programa. E trabou di e fundacion ta enfoca riba educacion, deteccion tempran y apoyo comunitario, cu meta pa mehora calidad di bida y salud publico.
“Nos bijdrage na e bon comun ta pa medio di programa di training y screening riba cancer di pecho, cancer di tripa y cancer di boca di matriz,” ta locual cu e directora di Fundashon ABO a indica durante entrevista.
E fundacion ta pone gran enfasis riba fortalece e sentido di comunidad y colaboracion, y ta kere firmemente den construccion di bienestar comun riba Aruba. Den e contexto di e Common Good Conference, e mensahe central ta cu prevencion y salud no ta solamente un responsabilidad individual, pero un esfuerso comparti cu ta beneficia henter sociedad.
Fundashon ABO tambe ta spera cu iniciativanan manera e conferencia lo crea oportunidad pa desaroya idea nobo y momento di visibilidad, permitiendo nan promove nan servicio mas ampliamente na Aruba y alcansa mas hende cu nan mensahe di prevencion.
E participacion di Fundashon ABO ta mustra con organisacion local ta pone e bon comun na practica cada dia, aportando di forma concreta na bienestar, resiliencia y futuro di e comunidad Arubiano.
