Como parti di e Common Good Conference y Expo, diferente organisacion riba Aruba ta comparti con nan ta traha activamente pa proteha e bon comun. Un di nan ta Fundacion Anti Droga Aruba, un fundacion cu ta enfoca riba prevencion di abuso di alcohol y droga, y riba reduccion di daño social cu esaki ta causa den comunidad.
Segun e fundacion, uzo/mal uzo di alcohol ta sigui ta un reto grandi riba Aruba, contribuyendo na accidentenan, incluso accidente fatal, cu tin impacto profundo riba famianan y sociedad. Pa medio di conscientisacion y educacion, Fundacion Anti Droga Aruba ta traha pa reduci e problema aki y pa promove un comunidad mas sano y responsabel.
“Nos meta ta cu tur hende por yega cas sigur, y cu comunidad tin informacion riba uzo y mal uzo di alcohol,” segun Romyko Winklaar di e fundacion.
E fundacion ta enfatisa cu informacion confiabel ta esencial, specialmente den un tempo caminda social media por distorciona mensahe y crea confusion riba e rol y servicio di organisacionnan cu ta traha pa e bon comun. Segun Winklaar, e Common Good Expo ta un oportunidad importante pa comunidad por topa directamente cu e fundacion, conoce nan proyecto y comprende con nan trabou ta impacta bida diario di tur ciudadano.
Fundacion Anti Droga Aruba ta invita e comunidad Arubiano pa pasa na e Common Good Expo riba 29 di januari cu lo tuma luga di 2:00 pm te 8:00 pm na Renaissance Wind Creek Conference Center, pa bishita e booth di e fundacion, conoce mas riba nan trayecto y proyecto, y ricibi informacion riba con pa bira mas consciente den uzo di alcohol y prevencion.
Pa medio di nan participacion, e fundacion ta reafirma su compromiso cu e bon comun, cu e meta pa crea un Aruba mas sigur, mas consciente y mas saludabel pa tur.
