Fundacion Dominicana Arubanse Juan Pablo Duarte a anuncia cu nan ta para solidario cu e causa pa pone un fin na e casonan di “Hit and Run” riba nos isla. E fundacion ta expresa cu ta inaceptabel pa laga un victima atras su so y huy for di e sitio despues di un accidente.
Pa e motibo aki, e fundacion ta sostene e yamada pa introduci castigo hopi mas severo pa esnan cu comete e acto iresponsabel aki. Nan ta haci un apelacion na henter comunidad pa uni y duna sosten na e iniciativa importante aki.
Pa demostra e sosten aki y haci e bos di pueblo resona, e fundacion lo ta habri pa publico firma e peticion durante dos anochi consecutivo.
Detaye pa pasa firma:
- Fechanan: Diahuebs 22 di Januari y Djabierne 23 di Januari.
- Orario: Di 7:00 pm te cu 10:00 pm.
- Luga: Oficina di Fundacion, situa na Nieuwstraat 34.
E fundacion ta invita tur hende pa pasa, firma y demostra cu hunto nos por logra cambio. Contigo siempre.
